ఉద్యోగుల భవిష్య నిధి సంస్థ (EPFO) తన కోట్లాది మంది ఖాతాదారులకు 2026 ఆర్థిక సంవత్సరానికి సంబంధించిన పీఎఫ్ వడ్డీని జమ చేసే ప్రక్రియను అధికారికంగా ప్రారంభించింది. కేంద్ర కార్మిక మంత్రి మన్సుఖ్ మాండవీయ తాజాగా మీడియాతో మాట్లాడుతూ, పీఎఫ్ చందాదారులు జూలై 15న తమ ఖాతాలను తనిఖీ చేసుకుని వడ్డీ ఏమేరకు జమ అయిందో చూసుకోవచ్చని స్పష్టం చేశారు.
ఈపీఎఫ్ఓ పరిధిలోని సరికొత్త ‘2.01 సీఐటీఈఎస్’ సాంకేతికతను అందుబాటులోకి తీసుకురావడం వల్ల సభ్యులు తమ ఖాతాలను ఎంతో సులభంగా ఆన్లైన్ ద్వారా యాక్సెస్ చేయవచ్చని మంత్రి వివరించారు. ఈ కొత్త పోర్టల్ ద్వారా సభ్యులకు ఎటువంటి అంతరాయం లేకుండా అత్యంత వేగంగా సేవలు అందుతాయని ఆయన భరోసా ఇచ్చారు.
34 కోట్ల మంది ఖాతాల్లోకి రూ.1.44 లక్షల కోట్లు
ప్రస్తుత ఆర్థిక సంవత్సరానికి గాను పీఎఫ్ నిల్వలపై 8.25 శాతం వడ్డీ రేటును ప్రభుత్వం ఖరారు చేసింది. ఈ వడ్డీ రేటు ప్రకారం దేశవ్యాప్తంగా ఉన్న దాదాపు 34 కోట్ల మంది ఈపీఎఫ్ఓ సభ్యుల ఖాతాల్లో సుమారుగా రూ. 1.44 లక్షల కోట్ల భారీ వడ్డీ నిధులు జమ కానున్నాయని మంత్రి మన్సుఖ్ మాండవీయ గణాంకాలతో సహా వివరించారు. ఈ ప్రక్రియ నిర్ణీత గడువులోగా పూర్తవుతుందని, జూలై 15 నాటికి అర్హులైన ఉద్యోగులందరి ఖాతాల్లో వడ్డీ డబ్బులు ప్రత్యక్షమవుతాయని చెప్పారు.
డీసెంట్రలైజ్డ్ విధానానికి స్వస్తి.. అంతా ఆన్లైన్
గతంలో పీఎఫ్ ఖాతాల వివరాలన్నీ డీసెంట్రలైజ్డ్ (వికేంద్రీకరణ) పద్ధతిలో ఉండటం వల్ల, ఖాతాదారుడు తన క్లెయిమ్లు లేదా ఇతర అభ్యర్థనల కోసం సంబంధిత ప్రాంతీయ కార్యాలయానికి మాత్రమే వెళ్లాల్సి వచ్చేదని మంత్రి గుర్తు చేశారు. కానీ తాజా ఐటీ మార్పుల వల్ల చందాదారులు దేశంలో ఎక్కడి నుంచైనా అన్ని రకాల సేవలను ఆన్లైన్లోనే నేరుగా పొందవచ్చని, ఇకపై రీజినల్ ఆఫీసుల చుట్టూ తిరగాల్సిన అవసరం లేదని స్పష్టం చేశారు.
ముఖ్యంగా ఒక ఉద్యోగి కంపెనీ మారినప్పుడు పీఎఫ్ బదిలీ (ట్రాన్స్ఫర్) ప్రక్రియ కూడా ఆన్లైన్లో ఆటోమేటిక్గా జరిగిపోతుందని వెల్లడించారు. అలాగే, ఉద్యోగులు పదవీ విరమణ చేసిన తర్వాత పెన్షన్ను దేశంలోని ఏ ప్రాంతీయ కార్యాలయం నుంచి అయినా ప్రాసెస్ చేసుకోవచ్చని, తమకు నచ్చిన ఏ బ్యాంకు ఖాతా ద్వారా అయినా పెన్షన్ నగదును సులభంగా పొందవచ్చని మంత్రి వివరించారు.
