విద్యార్థి ఉద్యమాల ద్వారా జాతీయ స్థాయిలో గుర్తింపు పొందిన కాక్రోచ్ జనతా పార్టీ (సీజేపీ) దేశవ్యాప్తంగా ప్రజలతో నేరుగా మమేకమయ్యే లక్ష్యంతో కొత్త ప్రచార కార్యక్రమాన్ని ప్రకటించింది. ‘క్యా బోల్తీ పబ్లిక్’ పేరుతో సెప్టెంబర్ నుంచి దేశవ్యాప్తంగా విస్తృత ప్రచారాన్ని ప్రారంభించనున్నట్లు సీజేపీ వ్యవస్థాపకుడు అభిజీత్ దీప్కే వెల్లడించారు. మహారాష్ట్రలోని ఛత్రపతి సంభాజీనగర్లో నిర్వహించిన కోర్ టీమ్ సమావేశం అనంతరం ఆయన మీడియాతో మాట్లాడారు.
ప్రజల సమస్యలే ప్రచారానికి కేంద్రబిందువు
ఈ కార్యక్రమం ద్వారా దేశవ్యాప్తంగా ప్రజల అభిప్రాయాలు, సమస్యలు, ఆకాంక్షలను నేరుగా తెలుసుకుని వాటిని జాతీయ స్థాయిలో ప్రస్తావించడమే తమ ప్రధాన లక్ష్యమని అభిజీత్ దీప్కే తెలిపారు. ముఖ్యంగా విద్య, ఉపాధి, యువత సంక్షేమం వంటి అంశాలపై ప్రజల అభిప్రాయాలను సేకరించి ప్రభుత్వాల దృష్టికి తీసుకెళ్లనున్నట్లు చెప్పారు.
విద్య, నిరుద్యోగంపై ప్రత్యేక దృష్టి
భారతీయ కుటుంబాలకు నాణ్యమైన విద్య అందుబాటులో లేకపోవడం, విద్యా ఖర్చులు పెరుగుతుండటం, యువతలో నిరుద్యోగ సమస్య తీవ్రమవడం వంటి అంశాలను తమ ఉద్యమంలో ప్రధాన అజెండాగా తీసుకోనున్నట్లు వెల్లడించారు. విద్యార్థులు, ఉద్యోగార్థులు ఎదుర్కొంటున్న సమస్యలను దేశవ్యాప్తంగా చర్చకు తీసుకురావడమే లక్ష్యమని పేర్కొన్నారు.
ప్రజాస్వామ్య సంస్థలపై విశ్వాసం పెరగాలి
సమాజంలో న్యాయవ్యవస్థ, మీడియా వంటి ప్రజాస్వామ్య సంస్థలపై ప్రజల విశ్వాసాన్ని మరింత బలోపేతం చేయాల్సిన అవసరం ఉందని అభిజీత్ దీప్కే అన్నారు. రాజ్యాంగ నిర్మాత డాక్టర్ బీఆర్ అంబేడ్కర్, మహాత్మా గాంధీ, జవహర్లాల్ నెహ్రూ ఆలోచనలు, విలువలే తమ ఉద్యమానికి స్ఫూర్తిగా నిలుస్తాయని తెలిపారు.
జాతీయ కమిటీ ప్రకటన.. ఉచిత సభ్యత్వ నమోదు
ఈ సమావేశంలో సీజేపీ జాతీయ వర్కింగ్ కమిటీని కూడా ప్రకటించారు. జాతీయ కన్వీనర్గా అభిజీత్ దీప్కే కొనసాగుతుండగా, సౌరవ్ దాస్, అశుతోష్ రంకా కో-కన్వీనర్లుగా నియమితులయ్యారు. పార్టీ సభ్యత్వ నమోదు ప్రక్రియను ప్రత్యేక వెబ్సైట్ ద్వారా ఉచితంగా ప్రారంభిస్తున్నట్లు వెల్లడించారు. అయితే ప్రస్తుతం రాజకీయ పార్టీగా ఎన్నికల్లో పోటీ చేసే ఆలోచన లేదని, ప్రజా సమస్యలపై ఉద్యమాలను బలోపేతం చేయడమే తమ ప్రాధాన్యత అని స్పష్టం చేశారు.
దేశవ్యాప్తంగా విస్తరణకు కార్యాచరణ
రాబోయే ఆరు నెలల్లో దేశంలోని వివిధ రాష్ట్రాల్లో కమిటీలను ఏర్పాటు చేసి సంస్థను విస్తరించాలని సీజేపీ నిర్ణయించింది. అలాగే వివిధ రాష్ట్రాల్లో ఉద్యమాలు చేస్తున్న విద్యార్థి సంఘాలకు సంఘీభావం ప్రకటిస్తూ, ప్రజా సమస్యల పరిష్కారం కోసం దేశవ్యాప్తంగా చైతన్య కార్యక్రమాలు నిర్వహించనున్నట్లు తెలిపింది.
