రంజాన్ మాసం సందర్భంగా ముస్లిం ఉద్యోగుల‌కు ఒక గంట మినహాయింపు, ఏపీ ప్రభుత్వం నిర్ణయం

April 8, 2022

ముస్లింలకు పవిత్రమైన రంజాన్‌ మాసం ఏప్రిల్ 2న ప్రారంభమైన విషయం తెలిసిందే. ఈ నేపథ్యంలో ఆంధ్రప్రదేశ్ రాష్ట్ర ప్రభుత్వం రాష్ట్రంలోని ముస్లిం ఉద్యోగస్తులకు గుడ్ న్యూస్ అందించింది. రంజాన్ మాసం సందర్భంగా ముస్లిం ఉద్యోగస్తులు నియమిత ఉపచారాలు నిర్వహించుకునేందుకు వీలుగా ఏప్రిల్ 3, 2022 నుండి మే 2, 2022 వరకు అన్ని పనిదినాల్లో గంట ముందుగానే విధులు ముగించుకుని వెళ్లేందుకు అనుమతినిస్తూ ప్రభుత్వం నిర్ణయం తీసుకుంది. అన్ని ప్ర‌భుత్వ శాఖ‌ల్లో ప‌ని చేస్తున్న ముస్లిం ఉద్యోగుల‌తో పాటు టీచర్లు, కాంట్రాక్ట్, ఔట్ సోర్సింగ్ లో పనిచేస్తున్న ముస్లిం సిబ్బంది కార్యాలయాల నుండి లేదా స్కూల్స్ నుండి గంట ముందుగానే వెళ్లేందుకు అనుమతి ఇస్తున్నట్టు పేర్కొన్నారు. ఈ మేరకు ఆంధ్రప్రదేశ్ రాష్ట్ర ప్రభుత్వ ప్రధాన కార్యదర్శి డా.సమీర్ శర్మ గురువారం నాడు ఉత్తర్వులు జారీ చేశారు.