భారతదేశాన్ని ‘వికసిత భారత్–2047’గా మార్చాలనే జాతీయ లక్ష్యానికి అనుగుణంగా, రాష్ట్రాన్ని ప్రపంచస్థాయి పోటీ ఆర్థిక వ్యవస్థగా తీర్చిదిద్దేందుకు ఆంధ్రప్రదేశ్ ప్రభుత్వం అత్యంత ప్రతిష్టాత్మకమైన రోడ్మ్యాప్ను సిద్ధం చేసింది. దేశ రాజధాని న్యూఢిల్లీలో ప్రధానమంత్రి నరేంద్ర మోదీ అధ్యక్షతన గురువారం నిర్వహించిన నీతి ఆయోగ్ 11వ పాలకమండలి సమావేశంలో ఆంధ్రప్రదేశ్ ముఖ్యమంత్రి చంద్రబాబు నాయుడు పాల్గొన్నారు.
ఈ సందర్భంగా ఆయన ‘స్వర్ణాంధ్ర @2047’ విజన్ డాక్యుమెంట్ను అత్యున్నత కౌన్సిల్ వేదికపై సమర్పించి, రాష్ట్రాన్ని ప్రగతిపథంలో నడిపించేందుకు అవలంబిస్తున్న సరికొత్త సాంకేతిక, పరిపాలనా వ్యూహాలను దేశవ్యాప్త ప్రతినిధుల ముందు ప్రదర్శించారు.
ఈ అత్యున్నత స్థాయి సమావేశంలో ముఖ్యమంత్రి ప్రస్తావించిన ప్రధాన ప్రణాళికలు మరియు విధానపరమైన ముఖ్యాంశాలు క్రింది విధంగా ఉన్నాయి..
రెండు సంవత్సరాల్లో రూ.23 లక్షల కోట్ల పెట్టుబడులు – సాంకేతిక పాలన
-
పెట్టుబడిదారుల నమ్మకం: రాష్ట్ర ప్రభుత్వం ప్రవేశపెట్టిన పారదర్శక విధానాలు, సుస్థిర సంస్కరణలు మరియు వ్యాపార అనుకూల వాతావరణం వల్ల పెట్టుబడిదారులలో నమ్మకం రెట్టింపైందని వివరించారు. దీని ఫలితంగానే గత రెండేళ్ల కాలంలో ఆంధ్రప్రదేశ్ ఏకంగా రూ.23 లక్షల కోట్లకు పైగా భారీ పెట్టుబడులను ఆకర్షించగలిగిందని సగర్వంగా ప్రకటించారు.
-
ఆర్టీజీఎస్ పునరుద్ధరణ: పరిపాలనా సామర్థ్యాన్ని పెంచేందుకు తమ ప్రభుత్వం రియల్ టైమ్ గవర్నెన్స్ సొసైటీ (RTGS), ఆర్టిఫిషియల్ ఇంటెలిజెన్స్ (AI) ఆధారిత అనలిటిక్స్, ప్రెడిక్టివ్ గవర్నెన్స్ టూల్స్ మరియు ‘అవేర్’ (AWARE) లాంటి అధునాతన మౌలిక సాంకేతికతను జోడించి డేటా ఆధారిత నిర్ణయాలు తీసుకుంటోందని స్పష్టం చేశారు. పెట్టుబడుల ఆకర్షణ కోసం రాష్ట్రాల మధ్య అనారోగ్యకరమైన పోటీ కంటే, మౌలిక వసతుల బలోపేతం మరియు వేగవంతమైన అనుమతులపైనే దృష్టి పెట్టాలని తోటి రాష్ట్రాలకు సూచించారు.
పేదరిక నిర్మూలన – సప్త సూత్రాల సంక్షేమ ఎజెండా
-
ప్రత్యక్ష నగదు బదిలీ: రాష్ట్రంలో శూన్య పేదరికం (Zero Poverty) సాధించడమే ప్రధాన లక్ష్యంగా మానవ వనరుల ఆధారిత వృద్ధి నమూనాను అమలు చేస్తున్నట్లు తెలిపారు. ఇందులో భాగంగా రాష్ట్రంలోని ప్రతి కుటుంబానికి కనీస అవసరాలైన ఇళ్లు, పారిశుధ్యం, రక్షిత తాగునీరు, స్వచ్ఛమైన వంట గ్యాస్, విద్యుత్, డిజిటల్ కనెక్టివిటీ మరియు ప్రత్యక్ష నగదు బదిలీ అనే సప్త సూత్రాల సంక్షేమ ఎజెండాను పూర్తిస్థాయిలో అందిస్తున్నట్లు వివరించారు.
-
అట్టడుగు వర్గాలకు సాధికారత: సమాజంలో ఉన్నత స్థానంలో ఉన్న మొదటి 10 శాతం మంది సంపన్నులు, అట్టడుగున ఉన్న 20 శాతం మంది పేదలకు విరాళాలు, మార్గదర్శకత్వం ద్వారా సహాయం అందించేలా రూపొందించిన వినూత్న ‘P4-MBK 10-20’ కార్యక్రమాన్ని కౌన్సిల్కు పరిచయం చేశారు. ప్రజారోగ్య రక్షణ కోసం డిజిటల్ హెల్త్ రికార్డులతో కూడిన ‘ప్రాజెక్ట్ సంజీవని’ని అమలు చేస్తున్నట్లు పేర్కొన్నారు.
ఏఐ విద్యా సంస్కరణలు – జనాభా నిర్వహణపై ప్రత్యేక ఫోకస్
-
విద్యా సంస్కరణలు: విద్యార్థులను గ్లోబల్ సిటిజన్స్గా మార్చేందుకు ఏఐ-ఆధారిత అభ్యసన విధానాలు, క్వాంటమ్ కంప్యూటింగ్ కోర్సులు మరియు పారిశ్రామిక రంగానికి అనుసంధానమైన ఉన్నత విద్యా సంస్కరణలను ప్రవేశపెట్టినట్లు ముఖ్యమంత్రి వెల్లడించారు. ఇదే సమయంలో రాష్ట్రంలో మారుతున్న జనాభా సమీకరణాలపై ఆయన ఆందోళన వ్యక్తం చేశారు.
-
తగ్గుతున్న సంతానోత్పత్తి రేటుపై ఆందోళన: ఆంధ్రప్రదేశ్లో సంతాన సాఫల్య నిష్పత్తి 1.5 కన్నా తక్కువకు పడిపోయిందని, దీనివల్ల భవిష్యత్తులో యువ శ్రామిక శక్తి కొరత, వృద్ధుల జనాభా పెరగడం వంటి సవాళ్లు ఎదురవుతాయని పేర్కొన్నారు. దీర్ఘకాలిక ఆర్థిక స్థిరత్వం కోసం ఒక ప్రత్యేక ‘జనాభా నిర్వహణ విధానాన్ని’ రూపొందిస్తున్నట్లు సభకు తెలిపారు.
సహకార సమాఖ్య స్ఫూర్తికి ఆంధ్రప్రదేశ్ కట్టుబడి ఉందని, కేంద్ర ప్రభుత్వంతో కలిసి ‘వికసిత్ భారత్’ స్వప్నాన్ని సాకారం చేయడంలో రాష్ట్రం ఎల్లప్పుడూ ముందుంటుందని ఈ సందర్భంగా పునరుద్ఘాటించారు.
