ప్రపంచంలో కోవిడ్-19 (కరోనావైరస్) కు వ్యాక్సిన్ తయారీ చేసిన తొలిదేశంగా రష్యా నిలిచిందని, రష్యా ఆరోగ్య శాఖ ఈ వ్యాక్సిన్ కు ఆమోదం తెలిపినట్లుగా అధ్యక్షుడు వ్లాదిమిర్ పుతిన్ ప్రకటించిన సంగతి తెలిసిందే. రష్యా తయారు చేసిన వ్యాక్సిన్ ను స్పుత్నిక్-వి గా రిజిస్టర్ చేశారు. ఈ నేపథ్యంలో ఈ వ్యాక్సిన్ మొదటి బ్యాచ్ ను రెండు వారాల్లోగా విడుదలకు సిద్ధం చేస్తునట్టు రష్యా ఆరోగ్యశాఖ మంత్రి మిఖాయిల్ మురాస్కో వెల్లడించారు. ముందుగా దేశ అవసరాలకే ప్రాధాన్యత ఇస్తామని, కొంతమేరకు వ్యాక్సిన్ ఉత్పత్తులను ఎగుమతి చేస్తామని మురాస్కో తెలిపారు. ఆ దేశానికి సంబంధించిన గమేలియా రీసెర్చ్ ఇన్స్టిట్యూట్ సహా మరో ఫార్మా సంస్థలో స్పుత్నిక్-వి ఉత్పత్తి మొదలుపెట్టారు. ఏడాదిలోనే 500 మిలియన్ డోసులు ఉత్పత్తి చేసే అవకాశం ఉన్నట్లుగా తెలుస్తుంది. అలాగే ఈ వ్యాక్సిన్ ఇచ్చే వారి పరిస్థితిని పర్యవేక్షించేందుకు రష్యా ప్రత్యేకంగా ఒక యాప్ను కూడా తయారుచేస్తునట్టు సమాచారం. ఈ యాప్ ద్వారా వ్యాక్సిన్ ప్రభావాలను అధ్యయనం చేయనున్నారు.
మ్యాంగో న్యూస్ యాప్ లింక్స్:
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xEYFJu