తెలంగాణ రాష్ట్రానికి హక్కుగా దక్కాల్సిన అంతర్రాష్ట్ర నదీజలాల రక్షణ, తుంగభద్ర జలాశయం నికర వాటా సాధన మరియు రాజోలిబండ డైవర్షన్ స్కీమ్ (RDS) ఆయకట్టు స్థిరీకరణే లక్ష్యంగా ముఖ్యమంత్రి రేవంత్ రెడ్డి బుధవారం జలసౌధలో నీటిపారుదల శాఖ ఉన్నతాధికారులతో ఉన్నత స్థాయి అత్యవసర సమీక్షా సమావేశాన్ని నిర్వహించారు.
ఈ ఉన్నత స్థాయి వేదికగా అంతర్రాష్ట్ర నదీజలాల వివాదాలపై సమగ్రంగా చర్చించడంతో పాటు, దశాబ్దాలుగా నలిగిపోతున్న ఆర్డీఎస్ బాధితుల గోసను తీర్చడానికి మరియు తెలంగాణ ప్రయోజనాలను కాపాడటానికి ఉమ్మడి రాష్ట్రాల సమన్వయంతో ముందుకు వెళ్తామని ఈ వేదికగా నదీజలాల పరిరక్షణపై తమ పటిష్టమైన సంకల్పాన్ని చాటారు.
రావాల్సింది 15.9 టీఎంసీలు.. వస్తున్నది 5 టీఎంసీలే! సీఎం ఆందోళన
తుంగభద్ర జలాశయం మరియు నది ప్రవాహం నుండి తెలంగాణకు చట్టబద్ధంగా దక్కాల్సిన 15.9 టీఎంసీల పూర్తి స్థాయి నికర జలాలకు బదులు, కొన్నేళ్లుగా కేవలం 5 నుంచి 6 టీఎంసీలకు మించి నీరు అందకపోవడంపై ముఖ్యమంత్రి రేవంత్రెడ్డి తీవ్ర ఆందోళన వ్యక్తం చేశారు. ఈ ప్రాజెక్టు పరిధిలో తెలంగాణ, ఆంధ్రప్రదేశ్, కర్ణాటక రాష్ట్రాలకు భాగస్వామ్యం ఉన్నందున, కేంద్ర జలసంఘం (CWC) ఆధ్వర్యంలో నీటి వాటాల సమర్థవంతమైన పంపిణీ కోసం తుంగభద్ర బోర్డును మరింత పటిష్టపరచాలని ఆయన డిమాండ్ చేశారు.
ఈ వివాదాలపై గురువారం కేంద్ర జలశక్తి మంత్రి సీఆర్ పాటిల్ సమక్షంలో మూడు రాష్ట్రాల ముఖ్యమంత్రుల మధ్య జరగబోయే ఉన్నత స్థాయి సమావేశంలో తెలంగాణ హక్కుల కోసం ఎట్టి పరిస్థితుల్లోనూ రాజీ పడకుండా గట్టిగా వాదించాలని ప్రభుత్వం నిర్ణయించింది.
ఆర్డీఎస్ ఆధునీకరణ ప్యాకేజీలు, పూడిక తొలగింపుపై కఠిన ఆదేశాలు
జోగులాంబ గద్వాల జిల్లాలోని 75 గ్రామాలకు చెందిన దాదాపు 83,987 ఎకరాల ఆయకట్టుకు సాగునీరు అందించే ఆర్డీఎస్ ఆనకట్ట ప్రస్తుతం తీవ్ర ప్రమాదకరంగా మారిందని అధికారులు సీఎం దృష్టికి తెచ్చారు. ఆర్డీఎస్ కాల్వ ఆధునికీకరణ కోసం తెలంగాణ ప్రభుత్వం ఇప్పటికే రూ. 59 కోట్లను కర్ణాటక ప్రభుత్వానికి డిపాజిట్ చేసినప్పటికీ, ప్యాకేజీ 1, 2 పనులు ఇప్పటికీ ప్రారంభం కాకపోవడంపై సీఎం అసంతృప్తి వ్యక్తం చేశారు. నిలిచిపోయిన ఈ పనులను తక్షణమే పట్టాలెక్కించేలా కర్ణాటక ప్రభుత్వంపై ఒత్తిడి తేవాలని నిర్ణయించారు.
మరోవైపు, తెలంగాణ భూభాగం వైపు భారీగా పేరుకుపోయిన పూడిక వల్ల నీటి మళ్లింపునకు తీవ్ర ఆటంకం కలుగుతోందని ఇంజనీర్లు వివరించారు. పూడిక పేరుకున్న ప్రాంతం కర్ణాటక పరిధిలో ఉన్నందున, 2004 నాటి నిపుణుల కమిటీ సిఫారసుల ప్రకారం యుద్ధప్రాతిపదికన పూడిక తీసేందుకు కేంద్రం చొరవతో పాటు కర్ణాటక సహకారం తీసుకోవాలని సీఎం సూచించారు.
తుమ్మిళ్ల ఎత్తిపోతలు, మల్లమ్మకుంట సామర్థ్యం పెంపు
ఆర్డీఎస్ ఆయకట్టును శాశ్వతంగా స్థిరీకరించి రైతులకు సాగునీటి భద్రత కల్పించేందుకు ఉద్దేశించిన తుమ్మిళ్ల ఎత్తిపోతల పథకంపై సీఎం ప్రత్యేక సమీక్ష నిర్వహించారు. తుమ్మిళ్ల ద్వారా గరిష్టంగా నీటిని మళ్లించడానికి వీలుగా మల్లమ్మకుంట బ్యాలెన్సింగ్ రిజర్వాయర్ నిల్వ సామర్థ్యాన్ని అత్యంత వేగంగా పెంచాలని అధికారులను ఆదేశించారు. ఇందుకు సంబంధించిన అనుబంధ పనులన్నింటినీ శరవేగంగా పూర్తి చేయాలని స్పష్టం చేశారు.
ఈ ఉన్నత స్థాయి సమీక్షా సమావేశంలో రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి, ఎంపీ మల్లు రవి, ప్రభుత్వ సలహాదారు జితేందర్ రెడ్డి, నీటిపారుదల శాఖ సలహాదారు ఆదిత్యనాథ్ దాస్ మరియు ఇతర సీనియర్ ఇంజనీరింగ్ ఉన్నతాధికారులు పాల్గొన్నారు.
