ఆంధ్రప్రదేశ్ జీవనాడి పోలవరం ప్రాజెక్టు నిర్మాణంలో మరో చారిత్రక మైలురాయి ఆవిష్కృతమైంది. ప్రాజెక్టు మనుగడకు అత్యంత కీలకమైన ‘డయాఫ్రం వాల్’ (D-Wall) నిర్మాణాన్ని ప్రభుత్వం విజయవంతంగా పూర్తి చేసింది. రాష్ట్ర భారీ నీటిపారుదల శాఖ మంత్రి నిమ్మల రామానాయుడు గురువారం పోలవరం ప్రాజెక్టును సందర్శించి, పూర్తయిన డయాఫ్రం వాల్ పనులను క్షేత్రస్థాయిలో పరిశీలించారు. ఈ సందర్భంగా ఆయన ప్రాజెక్టు నిర్మాణంలో పాలుపంచుకున్న ఇంజనీర్లు, కార్మికులను ప్రత్యేకంగా అభినందించి, స్వీట్లు తినిపించి సన్మానించారు.
ఇక ఈ సందర్భంగా ముఖ్యమంత్రి నారా చంద్రబాబు నాయుడు పోలవరం ప్రాజెక్టు నిర్మాణంలో ఒక చారిత్రక మైలురాయిని అధిగమించినట్లు ప్రకటించారు. ప్రాజెక్టు మనుగడకు అత్యంత కీలకమైన 1,372 మీటర్ల పొడవైన డయాఫ్రం వాల్ (D-Wall) నిర్మాణాన్ని రికార్డు స్థాయిలో కేవలం 440 రోజుల్లోనే పూర్తి చేయడంపై ఆయన హర్షం వ్యక్తం చేశారు. ప్రాజెక్టు ప్రధాన డ్యామ్ అయిన ఎర్త్ కమ్ రాక్ ఫిల్ (ECRF) డ్యామ్ పునాదికి ఈ గోడ రక్షణ కవచంలా నిలవనుంది.
ఈ విజయానికి కృషి చేసిన ఇరిగేషన్ శాఖ అధికారులు, ఇంజనీర్లు మరియు నిర్మాణ సంస్థలకు ముఖ్యమంత్రి హృదయపూర్వక అభినందనలు తెలిపారు. గత ప్రభుత్వ నిర్లక్ష్యం కారణంగా పాత డయాఫ్రం వాల్ దెబ్బతినడంతో, రాష్ట్ర ఖజానాపై అదనంగా రూ.1000 కోట్ల భారం పడిందని సీఎం చంద్రబాబు గుర్తు చేశారు.
నాడు కాపర్ డ్యామ్లు పూర్తి చేయకుండానే గ్యాప్లు వదిలేయడం వల్ల గోదావరి వరదల తాకిడికి పాత గోడ కొట్టుకుపోయిందని, అది రాష్ట్రానికి జరిగిన పెద్ద నష్టమని ఆయన ఆవేదన వ్యక్తం చేశారు. అయినప్పటికీ, పట్టుదలతో కొత్త డయాఫ్రం వాల్ను నిర్మించి, ప్రాజెక్టు పనులను మళ్ళీ గాడిలో పెట్టామని తెలిపారు. ఈ కీలక ఘట్టం పూర్తి కావడంతో, ప్రధాన ఆనకట్ట అయిన ఎర్త్ కమ్ రాక్ ఫిల్ (ECRF) డ్యామ్ నిర్మాణానికి మార్గం సుగమమైందని, 2027 నాటికి ప్రాజెక్టును పూర్తి చేయడమే లక్ష్యంగా ప్రభుత్వం పనిచేస్తోందని స్పష్టం చేశారు. ఎక్స్ (ట్విట్టర్) వేదికగా పేర్కొన్నారు.
ఆంధ్రప్రదేశ్ జీవనాడి పోలవరం ప్రాజెక్టును పూర్తి చేయాలన్న ప్రభుత్వ సంకల్పంలో నేడు మరో కీలక ఘట్టం పూర్తయ్యింది. ప్రాజెక్టు నిర్మాణంలో అత్యంత కీలకమైన 1372 మీటర్ల పొడవైన 'డయాఫ్రం వాల్' నిర్మాణాన్ని తక్కువ సమయంలో పూర్తి చేసిన ఇరిగేషన్ శాఖ అధికారులకు, ఇంజనీర్లకు అభినందనలు. దీనికి… pic.twitter.com/yfwsbBcgyq
— N Chandrababu Naidu (@ncbn) April 2, 2026
పోలవరం డయాఫ్రం వాల్ – ముఖ్యాంశాలు:
-
నిర్మాణ విశేషాలు: గోదావరి నది గర్భంలో 1,372 మీటర్ల పొడవునా ఈ డయాఫ్రం వాల్ను నిర్మించారు. నది ఇసుక తిన్నెల అడుగున ఉన్న రాతి పొర (Rock base) వరకు సుమారు 40 నుంచి 100 మీటర్ల లోతు వరకు కాంక్రీట్ గోడను నిర్మించడం ఒక ఇంజనీరింగ్ అద్భుతం.
-
వేగవంతమైన పనులు: డిసెంబర్ 2025లో ప్రారంభమైన ఈ పనులు, నిరంతర పర్యవేక్షణతో కేవలం 99 రోజుల్లోనే పూర్తి కావటం విశేషం. దీనివల్ల ప్రధాన డ్యామ్ (ECRF) పనులకు మార్గం సుగమమైంది.
-
కేంద్రం సహకారం: ఈ ప్రాజెక్టు పూర్తికి సహకరించిన కేంద్ర జలశక్తి శాఖ, పోలవరం ప్రాజెక్టు అథారిటీ (PPA) మరియు ఇతర కేంద్ర సంస్థలకు ముఖ్యమంత్రి కృతజ్ఞతలు తెలిపారు.
-
వచ్చే లక్ష్యం: డయాఫ్రం వాల్ పూర్తి కావడంతో ఇప్పుడు ఎర్త్ కమ్ రాక్ ఫిల్ డ్యామ్ నిర్మాణాన్ని యుద్ధ ప్రాతిపదికన చేపట్టి, నిర్ణీత గడువులోగా పూర్తి చేయాలని ప్రభుత్వం లక్ష్యంగా పెట్టుకుంది.
రాష్ట్ర ప్రజల చిరకాల స్వప్నమైన పోలవరం ప్రాజెక్టును 2027 గోదావరి పుష్కరాలకు ముందే పూర్తి చేసి జాతికి అంకితం చేస్తామని సీఎం చంద్రబాబు నాయుడు ఈ సందర్భంగా హామీ ఇచ్చారు. ఈ ప్రాజెక్టు పూర్తయితే ఆంధ్రప్రదేశ్ అక్షరాలా ‘రత్నాల సీమ’గా మారుతుందని, కరువు రహిత రాష్ట్రంగా అవతరిస్తుందని ధీమా వ్యక్తం చేశారు. సాగునీటితో పాటు విశాఖ నగరానికి తాగునీరు, పారిశ్రామిక అవసరాలకు ఈ ప్రాజెక్టు వెన్నెముకగా నిలవనుంది.
ప్రస్తుతం డయాఫ్రం వాల్ పనులు ముగియడంతో, వర్షాకాలం ప్రారంభం కావడానికి ముందే ప్రధాన డ్యామ్ పనులలో గణనీయమైన పురోగతి సాధించాలని ఇరిగేషన్ శాఖ అధికారులను ముఖ్యమంత్రి ఆదేశించారు. పోలవరం ప్రాజెక్టును కేవలం ఒక కట్టడంగా కాకుండా, ఆంధ్రుల జీవనరేఖగా భావించి పని చేయాలని పిలుపునిచ్చారు. ఈ విజయం రాష్ట్ర అభివృద్ధి ప్రయాణంలో ఒక మైలురాయిగా నిలిచిపోతుందని రాజకీయ విశ్లేషకులు భావిస్తున్నారు.
గవర్నర్ పోలవరం సందర్శన:
ఇక ఇదిలావుంటే, మరోవైపు ఏపీ గవర్నర్ ఎస్. అబ్దుల్ నజీర్ గురువారం సతిసమేతంగా పోలవరం ప్రాజెక్టును సందర్శించారు. కాకినాడ జేఎన్టీయూ స్నాతకోత్సవంలో పాల్గొన్న ఆయన అక్కడినుండి హెలికాఫ్టర్లో నేరుగా పోలవరం వచ్చి ప్రాజెక్టు మొత్తాన్ని ఏరియల్ సర్వే ద్వారా వీక్షించారు. అనంతరం ప్రాజెక్ట్ ప్రాంతాన్ని సందర్శించి వివిధ పనులను పరిశీలించారు. ఇక గవర్నర్ పర్యటన సందర్భంగా ఏలూరు జిల్లాలో కట్టుదిట్టమైన భద్రతా ఏర్పాట్లు చేపట్టారు. జిల్లా ఎస్పీ కె. ప్రతాప్ శివ కిషోర్, IPS ఆధ్వర్యంలో పోలీసులు విస్తృతంగా బందోబస్తు నిర్వహించగా, అధికారులు గవర్నర్కు పుష్పగుచ్ఛాలతో స్వాగతం పలికారు.
