నగరంలోని కేబీఆర్ పార్క్ పరిసర ప్రాంతాల్లో ట్రాఫిక్ రద్దీని నియంత్రించేందుకు తెలంగాణ ప్రభుత్వం కీలక నిర్ణయం తీసుకుంది. హెచ్-సిటీ ప్రాజెక్ట్ పనుల నేపథ్యంలో కేబీఆర్ పార్క్ చుట్టూ వన్వే ట్రాఫిక్ విధానాన్ని మంగళవారం నుంచి అమల్లోకి తీసుకొచ్చారు. ఈ కొత్త ట్రాఫిక్ నిబంధనలు సుమారు రెండేళ్ల పాటు కొనసాగనున్నాయి.
కీలక జంక్షన్ల వద్ద కొత్త మార్గదర్శకాలు
వన్వే ట్రాఫిక్ విధానానికి అనుగుణంగా కేబీఆర్ పార్క్ పరిసరాల్లోని కీలక జంక్షన్ల వద్ద రోడ్ మార్కింగ్లు, సైన్ బోర్డులను ట్రాఫిక్ పోలీసులు ఏర్పాటు చేశారు. వాహనదారులకు మార్గాలపై స్పష్టత ఉండేలా అవసరమైన సూచనలు అందుబాటులో ఉంచారు. ట్రాఫిక్ నిర్వహణ కోసం సిబ్బందిని నాలుగు షిఫ్ట్లలో అందుబాటులో ఉంచినట్లు అధికారులు తెలిపారు.
24 గంటలూ సీసీటీవీ, డ్రోన్లతో నిఘా
కొత్త ట్రాఫిక్ విధానంలో నిబంధనలు ఉల్లంఘించకుండా పోలీసులు ప్రత్యేక నిఘా ఏర్పాటు చేశారు. సీసీటీవీ కెమెరాలు, డ్రోన్ల ద్వారా 24 గంటలూ రియల్టైమ్ మానిటరింగ్ చేపడుతున్నారు. వాహనాల రాకపోకలను నిరంతరం పర్యవేక్షిస్తూ ట్రాఫిక్ పరిస్థితులకు అనుగుణంగా అవసరమైన చర్యలు తీసుకోనున్నారు.
నావిగేషన్ యాప్ల్లోనూ రూట్ల మార్పులు
కొత్త వన్వే మార్గాలకు అనుగుణంగా గూగుల్ మ్యాప్స్తో పాటు ఇతర నావిగేషన్ యాప్లలోనూ రూట్లకు సంబంధించిన మార్పులు చేసినట్లు అధికారులు వెల్లడించారు. దీంతో వాహనదారులు తమ ప్రయాణానికి ముందే మార్గాలను పరిశీలించుకోవాలని సూచించారు.
రాంగ్ సైడ్ డ్రైవింగ్పై కఠిన చర్యలు
వన్వే నిబంధనలు ఉల్లంఘించి రాంగ్ సైడ్లో వాహనాలు నడిపితే కఠిన చర్యలు తప్పవని హైదరాబాద్ ట్రాఫిక్ పోలీసులు హెచ్చరించారు. ట్రాఫిక్ ఆంక్షల నేపథ్యంలో వాహనదారులు కొత్త మార్గాలను పాటిస్తూ పోలీసులకు సహకరించాలని కోరారు.
హెచ్-సిటీ ప్రాజెక్ట్ పనులు పూర్తయ్యే వరకు ట్రాఫిక్ నిర్వహణను సజావుగా కొనసాగించేందుకు ఈ మార్పులు చేపట్టినట్లు అధికారులు తెలిపారు.
