ఓటరు జాబితాల ప్రత్యేక సమగ్ర సవరణ (SIR) అంశంపై కాంగ్రెస్ వర్కింగ్ కమిటీ (CWC) తీవ్ర అభ్యంతరాలు వ్యక్తం చేసింది. ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, ప్రధాన ఎన్నికల కమిషనర్ (CEC) జ్ఞానేశ్ కుమార్ రాజీనామా చేయాలని డిమాండ్ చేస్తూ సీడబ్ల్యూసీ తీర్మానం చేసింది. అలాగే SIR ప్రక్రియను తక్షణమే నిలిపివేసి, తొలగించినట్లు కాంగ్రెస్ చెబుతున్న 13.30 కోట్ల పేర్లను తిరిగి ఓటరు జాబితాల్లో చేర్చాలని కోరింది.
ఈసీపై ఖర్గే, రాహుల్ విమర్శలు
ఢిల్లీలో కాంగ్రెస్ అధ్యక్షుడు మల్లికార్జున ఖర్గే అధ్యక్షతన జరిగిన సీడబ్ల్యూసీ సమావేశం సుమారు రెండున్నర గంటల పాటు కొనసాగింది. ఎన్నికల ప్రక్రియలో పారదర్శకతపై అనుమానాలు తలెత్తుతున్నాయని ఖర్గే ఆరోపించారు. SIR కారణంగా ఓటర్ల హక్కులకు భంగం కలిగే అవకాశం ఉందని కాంగ్రెస్ పేర్కొంది. పార్టీ డిమాండ్లలో ఓటరు జాబితాల్లో మార్పులకు సంబంధించిన పూర్తి సమాచారాన్ని బహిరంగపరచడం, రాజకీయ పార్టీలకు డేటాను అందించడం, తీవ్రమైన అవకతవకలపై స్వతంత్ర దర్యాప్తు చేపట్టడం కూడా ఉన్నాయి.
పోరాటం కొనసాగిస్తామన్న కాంగ్రెస్
సీడబ్ల్యూసీ సమావేశంలో రాహుల్గాంధీ ఎన్నికల నిర్వహణపై కాంగ్రెస్ లేవనెత్తుతున్న అంశాలను ప్రస్తావించారు. జైరాం రమేశ్, కేసీ వేణుగోపాల్ మీడియాతో మాట్లాడుతూ ఎన్నికల సంఘం, కేంద్ర ప్రభుత్వంపై పలు ఆరోపణలు చేశారు. ఈ అంశంపై పార్లమెంట్, న్యాయస్థానాలు, ప్రజాక్షేత్రంలో పోరాటం కొనసాగిస్తామని కాంగ్రెస్ తీర్మానంలో పేర్కొంది. ఇదిలా ఉండగా, ఎన్నికల సంఘం మాత్రం తన నిర్ణయాలు చట్టబద్ధమైన విధానాల ప్రకారమే జరుగుతున్నాయని స్పష్టం చేసింది.
