భారతీయ టెలికాం, డిజిటల్ రంగంలో సంచలనాలు సృష్టించిన రిలయన్స్ ఇండస్ట్రీస్‌కు చెందిన ‘జియో ప్లాట్‌ఫామ్స్ లిమిటెడ్’ (JPL) తొలి పబ్లిక్ ఆఫర్ (IPO) అక్టోబర్ 21 నుంచి అధికారికంగా ప్రారంభమైంది. ఈ చారిత్రాత్మక పరిణామంపై రిలయన్స్ జియో ఇన్ఫోకామ్ ఛైర్మన్ ఆకాశ్‌ అంబానీ స్పందిస్తూ.. ఈ ఐపీఓ తమ కంపెనీ పరిణామ క్రమంలో ఒక సరికొత్త అధ్యాయానికి నాంది పలుకుతుందని అభివర్ణించారు.
ఈ పబ్లిక్ ఇష్యూ ద్వారా వాటాదారులు, కస్టమర్లు మరియు ఇతర భాగస్వాముల పట్ల తమ బాధ్యత మరింత పెరుగుతుందని ఆయన పేర్కొన్నారు. భారతదేశ రిటైల్ పెట్టుబడిదారులతో రిలయన్స్‌కు ఎంతో బలమైన, దీర్ఘకాలిక అనుబంధం ఉందని ఆకాశ్‌ అంబానీ గుర్తుచేశారు. ఈ ఐపీఓ ప్రక్రియలో పారదర్శకత, సుస్థిర వృద్ధికి అత్యంత ప్రాధాన్యత ఇస్తున్నామని తెలిపారు.
అలాగే, డిజిటల్ సేవల పరిధిని మరింత విస్తృతం చేయడం, మొబైల్ డేటా వినియోగానికి అనుగుణంగా మెరుగైన సేవలు అందించడం, హోమ్ బ్రాడ్‌బ్యాండ్ మరియు ఫిక్స్‌డ్ వైర్‌లెస్ యాక్సెస్ నెట్‌వర్క్‌ను దేశవ్యాప్తంగా బలోపేతం చేయడమే తమ ప్రధాన లక్ష్యమని ఆకాశ్‌ అంబానీ స్పష్టం చేశారు.
ప్రపంచ టెక్ దిగ్గజాలైన మెటా, గూగుల్ వంటి సంస్థలు జియో ప్లాట్‌ఫామ్స్‌లో వ్యూహాత్మక వాటాదారులుగా కొనసాగుతున్న విషయాన్ని ఈ సందర్భంగా ఆయన ప్రస్తావించారు. భారతదేశ డిజిటల్ ఆర్థిక వ్యవస్థపై ఈ దిగ్గజ కంపెనీలు పెట్టుకున్న నమ్మకానికి, చూస్తున్న ఉజ్వల అవకాశాలకు ఈ భాగస్వామ్యమే నిదర్శనమని చెప్పారు.
మరోవైపు, మార్కెట్లో ప్రారంభమైన కొద్ది నిమిషాల్లోనే జియో ప్లాట్‌ఫామ్స్ ఐపీఓకు మదుపర్ల నుంచి అపూర్వ స్పందన లభించడం విశేషం. రూ.30,213 కోట్లతో ప్రారంభం కాగా, కేవలం కొన్ని నిమిషాల్లోనే 100% సబ్ స్క్రిప్షన్ అందుకోవడం గమనార్హం. జియో ఆఫర్ చేసిన 19.75 కోట్ల షేర్లకు గానూ 10:36 గంటలకే 20.03 కోట్ల షేర్లకు బిడ్స్ దాఖలయ్యాయి.
