సీఎంగా మూడేళ్లు పూర్తిచేసుకున్న వైఎస్ జగన్, ఎన్నో మంచి ప‌నుల‌కు శ్రీ‌కారం చుట్టామని ప్రకటన

May 30, 2022

ఆంధ్రప్రదేశ్ రాష్ట్రంలో వైఎస్సార్సీపీ ప్రభుత్వం అధికారంలోకి వచ్చి నేటితో మూడేళ్లు అయింది. రాష్ట్ర ముఖ్యమంత్రిగా వైఎస్ జగన్ మోహన్ రెడ్డి నేటితో మూడేళ్ల పాలన పూర్తి చేసుకున్నారు. అధికారంలోకి వచ్చి మూడేళ్లు పూర్తవడంతో పార్టీ కేంద్ర కార్యాలయం వద్ద, రాష్ట్రవ్యాప్తంగా వైఎస్సార్సీపీ నాయకులు, కార్యకర్తలు ఘనంగా సంబరాలు చేసుకుంటున్నారు. ఈ సందర్భంగా సీఎం వైఎస్ జగన్ ట్విట్టర్ వేదికగా స్పందించారు.

“మీరు చూపిన ప్రేమ‌, మీరు అందించిన ఆశీస్సుల‌తో ముఖ్య‌మంత్రిగా బాధ్య‌త‌లు చేప‌ట్టి మూడేళ్లు అవుతోంది. మీరు నాపై పెట్టుకున్న‌ న‌మ్మ‌కాన్ని నిల‌బెట్టుకుంటూ గ‌డిచిన మూడేళ్ల‌లో 95శాతానికి పైగా హామీల‌ను అమ‌లు చేశాం. ఎన్నో మంచి ప‌నుల‌కు శ్రీ‌కారం చుట్టాం. రాబోయే రోజుల్లో మీకు మరింతగా సేవ చేస్తానని, మీ ప్రేమాభిమానాలు నాపై ఎప్పటికీ ఇలాగే ఉండాలని మ‌న‌స్ఫూర్తిగా కోరుకుంటున్నా. మీకు సేవ చేసే భాగ్యాన్ని నాకు కల్పించినందుకు మ‌రొక్క‌సారి అందరికీ కృత‌జ్ఞ‌త‌లు తెలియ‌జేసుకుంటున్నాను” అని సీఎం వైఎస్ జగన్ పేర్కొన్నారు.