ఆంధ్రప్రదేశ్ రాష్ట్ర ఉప ముఖ్యమంత్రి పవన్ కల్యాణ్కు ముంబైలో శనివారం విజయవంతంగా భుజం శస్త్రచికిత్స జరిగింది. రెండు భుజాలకు తీవ్ర రొటేటర్ కఫ్ గాయాలు (Rotator Cuff Injuries), కండరాల చీలికలు (Muscle Tears) ఉండటంతో వైద్యుల బృందం సుమారు మూడున్నర గంటల పాటు సంక్లిష్ట శస్త్రచికిత్స నిర్వహించింది. ప్రస్తుతం ఆయన ఆరోగ్య పరిస్థితి నిలకడగా ఉందని వైద్యులు వెల్లడించారు. ఈ నేపథ్యంలో ముఖ్యమంత్రి చంద్రబాబు నాయుడు పవన్ కల్యాణ్ త్వరగా కోలుకోవాలని ఆకాంక్షిస్తూ ప్రత్యేక సందేశాన్ని విడుదల చేశారు.
కుడి భుజానికి సర్జరీ.. మరో రెండు నెలల్లో ఎడమ భుజానికి చికిత్స
వైద్యుల సూచన మేరకు ప్రస్తుతం పవన్ కల్యాణ్ కుడి భుజానికి మాత్రమే శస్త్రచికిత్స నిర్వహించారు. రెండు భుజాలకు ఒకేసారి ఆపరేషన్ చేస్తే తీవ్రమైన నొప్పి, కోలుకోవడానికి ఎక్కువ సమయం పట్టే అవకాశం ఉండటంతో ఆ నిర్ణయం తీసుకున్నారు. పూర్తిగా కోలుకున్న తర్వాత సుమారు రెండు నెలల వ్యవధిలో ఎడమ భుజానికి రెండో విడత శస్త్రచికిత్స చేయనున్నట్లు వైద్యులు తెలిపారు. శస్త్రచికిత్స అనంతరం ఆయనను వైద్యుల ప్రత్యేక పర్యవేక్షణలో ఉంచి అవసరమైన చికిత్స అందిస్తున్నారు.
ఏళ్లుగా వెంటాడిన భుజాల గాయాలు
పవన్ కల్యాణ్ భుజాల సమస్య కొత్తది కాదు. 2016లో మొదటిసారి భుజానికి గాయం అయినప్పటికీ, వైద్యులు విశ్రాంతి తీసుకోవాలని సూచించినా ప్రజా కార్యక్రమాలు, రాజకీయ పర్యటనలను కొనసాగించారు. గబ్బర్ సింగ్ సినిమా షూటింగ్ సమయంలో మొదటిసారి ఆయనకు గాయాలయ్యాయి. ఆ తర్వాత జనసేన కార్యక్రమాలు, పోరాట యాత్రలు, ఎన్నికల ప్రచారాల్లో అభిమానులతో నిరంతరం కరచాలనం చేయడం, భారీ జనసందోహాల్లో పాల్గొనడం వల్ల గాయాలు మరింత తీవ్రమయ్యాయి. అయినప్పటికీ ప్రజల మధ్యే ఉంటూ తన రాజకీయ కార్యక్రమాలను కొనసాగించారు.
ఎన్నికల ప్రచారంతో మరింత తీవ్రత
వారాహి యాత్రలు, ఇటీవల జరిగిన సార్వత్రిక ఎన్నికల ప్రచారంలో కూడా పవన్ కల్యాణ్ తీవ్ర నొప్పిని భరిస్తూనే ప్రజల మధ్య పర్యటించారు. గత ఏప్రిల్లో ముక్కు శస్త్రచికిత్స సందర్భంగా నిర్వహించిన వైద్య పరీక్షల్లో రెండు భుజాల కండరాలు తీవ్రంగా దెబ్బతిన్నట్లు వైద్యులు గుర్తించారు. వెంటనే శస్త్రచికిత్స అవసరమని సూచించినప్పటికీ, ఇప్పటికే నిర్ణయించిన ప్రభుత్వ కార్యక్రమాలు, ప్రజా సమావేశాలు పూర్తి చేసిన తర్వాతే ఆయన ముంబైలో చికిత్సకు వెళ్లారు.
పవన్ త్వరగా కోలుకోవాలి: సీఎం చంద్రబాబు
ఉప ముఖ్యమంత్రి శస్త్రచికిత్స విజయవంతంగా పూర్తవడంపై ముఖ్యమంత్రి చంద్రబాబు నాయుడు తన అధికారిక ‘ఎక్స్’ ఖాతా ద్వారా స్పందించారు. “ఉప ముఖ్యమంత్రి పవన్ కల్యాణ్ త్వరగా కోలుకోవాలని ఆకాంక్షిస్తున్నాను. ఈ సమయంలో ఆయనకు మంచి ఆరోగ్యం, సంపూర్ణ శక్తి చేకూరాలని భగవంతుడిని ప్రార్థిస్తున్నాను” అని పేర్కొన్నారు. పవన్ కల్యాణ్ త్వరగా కోలుకుని తిరిగి ప్రజా సేవలో చురుకుగా పాల్గొనాలని జనసేన శ్రేణులు, కూటమి నాయకులు, అభిమానులు ఆకాంక్షిస్తున్నారు.
Wishing Hon’ble Deputy Chief Minister Shri Pawan Kalyan garu a full and speedy recovery. I pray for his good health and wish him strength during this time.@PawanKalyan
— N Chandrababu Naidu (@ncbn) July 11, 2026
