విశాఖపట్నం ఉక్కు కర్మాగారంలో సోమవారం సాయంత్రం ఒక ఊహించని ఘోర ప్రమాదం చోటుచేసుకుంది. కర్మాగారంలోని స్టీల్ మెల్టింగ్ షాప్ విభాగంలో దాదాపు 1,500 డిగ్రీల అత్యధిక ఉష్ణోగ్రతతో, సలసలా కాగుతున్న 150 టన్నుల ద్రవరూప ఉక్కును (హాట్ మెటల్) తరలిస్తున్న భారీ ల్యాడిల్ ఒక్కసారిగా పేలిపోయింది. ఈ దుర్ఘటనలో మేనేజర్ స్థాయి అధికారి నుంచి కాంట్రాక్టు కార్మికుల వరకు మొత్తం 9 మంది సిబ్బంది మంటల్లో చిక్కుకుని అక్కడికక్కడే సజీవ దహనమయ్యారు.
ప్రమాద తీవ్రతకు ల్యాడిల్ చుట్టుపక్కల దాదాపు 25 అడుగుల మేర అగ్నిపర్వతం నుంచి లావా వెదజల్లినట్లు హాట్ మెటల్ చిమ్మడంతో, ఏం జరిగిందో తెలిసేలోపే కార్మికుల మృతదేహాలు బొగ్గుల్లా మాడిపోయాయి. మరో ఆరుగురు సిబ్బంది తీవ్రంగా గాయపడగా, వారిలో ఇద్దరి పరిస్థితి అత్యంత విషమంగా ఉన్నట్లు వైద్యులు తెలిపారు.
ప్రధాని నరేంద్ర మోదీ, సీఎం చంద్రబాబు తీవ్ర దిగ్భ్రాంతి – ఎక్స్గ్రేషియా ప్రకటన
-
ప్రధానమంత్రి నరేంద్ర మోదీ దిగ్భ్రాంతి: విశాఖ ఉక్కు కర్మాగారంలో జరిగిన ఘోర ప్రమాదంపై ప్రధాని మోదీ తీవ్ర ఆవేదన, దిగ్భ్రాంతి వ్యక్తం చేశారు. ప్రాణాలు కోల్పోయిన కార్మికుల కుటుంబాలకు తన నైవేద్యాన్ని, ప్రగాఢ సానుభూతిని తెలియజేశారు. గాయపడిన వారు త్వరగా కోలుకోవాలని ఆకాంక్షించారు. బాధితులను ఆదుకునేందుకు ప్రధానమంత్రి జాతీయ సహాయ నిధి (PMNRF) నుంచి మృతుల కుటుంబాలకు రూ. 2 లక్షల చొప్పున మరియు తీవ్రంగా గాయపడిన క్షతగాత్రులకు రూ. 50,000 చొప్పున తక్షణ ఆర్థిక సహాయాన్ని (Ex-gratia) ప్రధాని ప్రకటించారు. స్థానిక అధికారులు బాధితులకు అన్ని విధాలా అండగా ఉండాలని ఆదేశించారు.
Saddened by the mishap at the Visakhapatnam Steel Plant. Condolences to those who have lost their loved ones. Praying that the injured recover at the earliest. The local authorities are providing all possible assistance to those affected.
An ex-gratia of Rs. 2 lakh from PMNRF…
— PMO India (@PMOIndia) June 8, 2026
-
ముఖ్యమంత్రి చంద్రబాబు నాయుడు సమీక్ష: ఈ దారుణ ఉర్ఘటనపై ఆంధ్రప్రదేశ్ సీఎం చంద్రబాబు తీవ్ర దిగ్భ్రాంతి వ్యక్తం చేశారు. ప్రమాదం గురించి తెలిసిన వెంటనే ఆయన ఉన్నతాధికారులతో మాట్లాడి సహాయక చర్యలను పర్యవేక్షించారు. అన్ని ప్రభుత్వ శాఖలు సమన్వయంతో పనిచేసి, ఫైర్ టెండర్ల ద్వారా మంటలను అదుపులోకి తీసుకురావాలని ఆదేశించారు. క్షతగాత్రులకు మెరుగైన వైద్యం అందేలా చూడాలని, బాధితుల కుటుంబాలను అన్ని విధాలా ఆదుకుంటామని సీఎం చంద్రబాబు భరోసా ఇచ్చారు.
విశాఖ స్టీల్ ప్లాంట్ లో జరిగిన ప్రమాదం నన్ను తీవ్ర దిగ్భ్రాంతికి గురి చేసింది. ఈ ప్రమాదంలో పలువురు కార్మికులు దుర్మరణం పాలయ్యారని తెలిసి కలత చెందాను. సంబంధిత అధికారులతో మాట్లాడి, అన్ని ప్రభుత్వ శాఖల సమన్వయంతో సహాయక చర్యలు చేపట్టాలని ఆదేశించాను.
— N Chandrababu Naidu (@ncbn) June 8, 2026
కేంద్ర మంత్రుల పర్యటన – భారీ పరిహారం
ప్రమాద తీవ్రత దృష్ట్యా కేంద్ర ఉక్కు మరియు భారీ పరిశ్రమల శాఖ మంత్రి హెచ్.డి. కుమారస్వామి సోమవారం రాత్రికే అత్యవసరంగా విశాఖపట్నం చేరుకున్నారు. ఆయనతో పాటు కేంద్ర ఉక్కు శాఖ సహాయ మంత్రి భూపతిరాజు శ్రీనివాస వర్మ కూడా ఘటనాస్థలికి బయలుదేరారు. క్షతగాత్రులను మెరుగైన వైద్యం కోసం అవసరమైతే తరలించేందుకు వీలుగా ప్రభుత్వం తరఫున ఎయిర్ అంబులెన్స్ను కూడా సిద్ధం చేశారు.
ఉక్కు యాజమాన్యం మరియు కేంద్ర మంత్రి కుమారస్వామి బాధితుల కోసం క్రింది సహాయక ప్యాకేజీని ప్రకటించారు:
-
మృతుల కుటుంబాలకు ఉక్కు యాజమాన్యం తరఫున రూ. 25 లక్షల చొప్పున, గాయపడిన వారికి రూ. 10 లక్షల చొప్పున పరిహారం అందుతుంది.
-
మృతుల్లో పర్మినెంట్ ఉద్యోగుల కుటుంబాలకు పిఎఫ్, ఇన్సూరెన్స్ అన్నీ కలిపి మొత్తంగా రూ. 1.5 కోట్ల వరకు, మరియు కాంట్రాక్టు కార్మికుల కుటుంబాలకు రూ. 35 లక్షల వరకు మొత్తం ఆర్థిక సహాయం అందేలా చర్యలు తీసుకుంటారు.
-
మృతుల కుటుంబాలలో ఒకరికి ప్రభుత్వ ఉద్యోగం కల్పించడంతో పాటు, సదరు ఉద్యోగి రిటైర్మెంట్ వయస్సు వచ్చే వరకు ఉక్కు క్వార్టర్స్లోనే నివాసం ఉండేందుకు అనుమతి ఇస్తారు. అలాగే వారి పిల్లల చదువులకు అయ్యే పూర్తి ఆర్థిక ఖర్చును యాజమాన్యమే భరిస్తుంది.
ప్రమాదానికి గల కారణాలు – పెరుగుతున్న పని ఒత్తిడి
హాట్ మెటల్లోని మలినాలను తొలగించే ప్రక్రియలో భాగంగా అల్యూమినియం, ఫెర్రో అలాయ్స్ వంటి మెటల్ యాడిటివ్స్ను కలిపి ఆక్సిజన్తో బ్లో చేసే సమయంలో జరిగిన రసాయన చర్య (Chemical Reaction) వల్లే ఈ పేలుడు సంభవించి ఉండవచ్చని ప్రాథమికంగా అనుమానిస్తున్నారు. ల్యాడిల్ పేలడం విశాఖ ఉక్కు చరిత్రలోనే కాకుండా దేశంలోనే మొదటిసారి కావడం గమనార్హం.
మరోవైపు, ప్లాంట్లో ఇటీవల సిబ్బంది కొరత కారణంగా ఉద్యోగులపై పని ఒత్తిడి విపరీతంగా పెరిగిందని, 8 గంటల షిఫ్ట్కు బదులు 12 గంటలు పనిచేయిస్తున్నారని కార్మిక సంఘాలు ఆరోపిస్తున్నాయి. నవంబర్ నుంచి ప్రవేశపెట్టిన ఉత్పత్తి ఆధారిత జీతాల విధానం వల్ల, భద్రతా ప్రమాణాలను పక్కనబెట్టి హడావిడిగా పనులు పూర్తి చేసే క్రమంలోనే ఇటువంటి ప్రమాదాలు జరుగుతున్నాయని యూనియన్ నాయకులు మండిపడుతున్నారు. ప్రస్తుతం ప్రమాదం జరిగిన ఎస్ఎంఎస్ ప్రాంగణాన్ని పోలీసులు బారికేడ్లతో అదుపులోకి తీసుకోగా, పూర్తి భద్రత కల్పిస్తేనే విధుల్లోకి వస్తామని కార్మికులు స్పష్టం చేశారు.
