భారతీయ జనసంఘ్ వ్యవస్థాపకుడు శ్యామాప్రసాద్ ముఖర్జీ జయంతిని పురస్కరించుకుని ప్రధానమంత్రి నరేంద్ర మోదీ ఆయనకు ఘనంగా నివాళులర్పించారు. దేశ ఐక్యత, అఖండత కోసం శ్యామాప్రసాద్ ముఖర్జీ చేసిన త్యాగాలు, కృషిని ఈ సందర్భంగా ప్రధానమంత్రి ప్రత్యేకంగా స్మరించుకున్నారు. ఆయన చూపిన పంథా, ఆదర్శాలు దేశంలోని కోట్లాది మంది ప్రజలకు ఎల్లప్పుడూ స్ఫూర్తినిస్తూనే ఉంటాయని కొనియాడారు.
भारतवर्ष की एकता, अखंडता और स्वाभिमान के लिए डॉ. श्यामा प्रसाद मुखर्जी का बलिदान हर पीढ़ी को प्रेरित करता रहेगा।
जयन्ति ते सुकृतिनो रससिद्धाः कवीश्वराः।
नास्ति येषां यशःकाये जरामरणजं भयम्॥ pic.twitter.com/qRIG8vPYZr
— Narendra Modi (@narendramodi) July 6, 2026
మాతృభూమి సేవలో అంకితం
శ్యామాప్రసాద్ ముఖర్జీ తన జీవితాన్ని మాతృభూమి సేవకే అంకితం చేశారని పీఎం మోదీ పేర్కొన్నారు. భారతదేశ బలీయమైన ఐక్యత కోసం ఆయన అలుపెరగని పోరాటం చేశారని, ముఖ్యంగా జమ్మూకశ్మీర్ విషయంలో ఆయన తీసుకున్న ధైర్యవంతమైన నిర్ణయాలు, చేసిన త్యాగం దేశ చరిత్రలో చిరస్థాయిగా నిలిచిపోతాయని ప్రశంసించారు. ఆయన కన్న కలలను సాకారం చేసే దిశగా, దేశాన్ని మరింత శక్తిమంతంగా మార్చేందుకు తమ ప్రభుత్వం నిరంతరం శ్రమిస్తోందని స్పష్టం చేశారు.
ప్రముఖుల నివాళులు
కేవలం ప్రధానమంత్రే కాకుండా దేశవ్యాప్తంగా ఉన్న పలువురు కేంద్ర మంత్రులు, బీజేపీ అగ్ర నేతలు శ్యాంప్రసాద్ ముఖర్జీ జయంతి సందర్భంగా ఆయన చిత్రపటాలకు పూలమాలలు వేసి ఘన నివాళులు అర్పించారు. స్వతంత్ర భారతదేశంలో ఒక బలమైన జాతీయవాద భావజాలాన్ని నిర్మించడంలో ఆయన పోషించిన పాత్రను ఈ సందర్భంగా స్మరించుకున్నారు. నవభారత నిర్మాణంలో ఆయన అందించిన స్ఫూర్తి ఎప్పటికీ మరువలేనిదని నేతలు కొనియాడారు.
ఎవరు ఈ శ్యామాప్రసాద్ ముఖర్జీ?
డాక్టర్ శ్యామాప్రసాద్ ముఖర్జీ 1951లో భారతీయ జనసంఘ్ను స్థాపించారు. స్వతంత్ర భారతదేశ తొలి కేంద్ర మంత్రివర్గంలోనూ ఆయన సేవలందించారు. జమ్మూకశ్మీర్కు ప్రత్యేక హోదా కల్పించిన ఆర్టికల్ 370, ప్రత్యేక రాజ్యాంగ నిబంధనలను ఆయన తీవ్రంగా వ్యతిరేకించారు. 1953లో జమ్మూకశ్మీర్లో ప్రవేశించే సమయంలో అరెస్టై నిర్బంధంలో ఉన్నప్పుడే ఆయన మరణించారు. అప్పటి నుంచి ఆయనను దేశ సమగ్రత కోసం పోరాడిన ప్రముఖ జాతీయవాద నాయకుడిగా బీజేపీ గుర్తిస్తూ ప్రతి ఏడాది జయంతిని ఘనంగా నిర్వహిస్తోంది.
దలైలామాకు జన్మదిన శుభాకాంక్షలు
టిబెటన్ బౌద్ధ మత గురువు, ఆధ్యాత్మిక నాయకుడు దలైలామా జన్మదినం సందర్భంగా ప్రధానమంత్రి నరేంద్ర మోదీ ఎక్స్ వేదికగా హృదయపూర్వక శుభాకాంక్షలు తెలిపారు. ప్రపంచవ్యాప్తంగా శాంతి, సామరస్యానికి దలైలామా అందిస్తున్న సందేశం కోట్లాది మందికి స్ఫూర్తిగా నిలుస్తోందని పేర్కొన్నారు. ఆయన నైతిక, ఆధ్యాత్మిక నాయకత్వం, ప్రపంచ శ్రేయస్సు కోసం చేస్తున్న కృషి ప్రశంసనీయమని కొనియాడిన ప్రధాని, దలైలామా దీర్ఘాయుష్షుతో సంపూర్ణ ఆరోగ్యంగా ఉండాలని ఆకాంక్షించారు.
Warm birthday greetings to His Holiness the Dalai Lama. His message of peace and harmony has been a guiding force for people across the world. His moral and spiritual strength and his commitment to global good are commendable. Wishing him a long and healthy life.@DalaiLama
— Narendra Modi (@narendramodi) July 6, 2026
