మెల్బోర్న్ లో జనవరి 29, బుధవారం నాడు జరిగిన ఆస్ట్రేలియన్ ఓపెన్ గ్రాండ్ స్లామ్ క్వార్టర్ ఫైనల్ మ్యాచ్ లో ప్రపంచ నంబర్ 1 రాఫెల్ నాదల్ ఓడిపోయాడు. ఊహించని విధంగా అందరి అంచనాలను తారుమారు చేస్తూ ఆస్ట్రియా ఆటగాడు, ఐదో సీడ్ డొమినిక్ థీమ్ 7–6 (7/3), 7–6 (7/4), 4–6, 7–6 (8/6)తో రాఫెల్ నాదల్ను బోల్తా కొట్టించాడు. టై బ్రేకర్స్ ద్వారా మొదటి రెండు సెట్లను కోల్పోవడంతో నాదల్ వెనుకబడిపోయాడు. మూడో సెట్ను నాదల్ 6-4తో చేజిక్కించుకున్నప్పటికీ నాలుగో సెట్ లో టై బ్రేకర్ తో థీమ్ మరోసారి పై చేయి సాధించి అద్భుత విజయాన్ని అందుకున్నాడు. 4 గంటలపైగా సాగిన ఈ మ్యాచ్లో డొమినిక్ థీమ్ 14 ఏస్లు సంధించి, నాలుగుసార్లు నాదల్ సర్వీసెస్ ను బ్రేక్ చేశాడు. ఫెడరర్ రికార్డును సమం చేయాలనుకున్న నాదల్ కు ఈ ఓటమితో షాక్ తగిలినట్టయింది.
మ్యాచ్ అనంతరం థీమ్ మాట్లాడుతూ, రాఫెల్ నాదల్ తో జరిగిన మ్యాచ్లో మానసికంగా కఠినమైన పరిస్థితి ఎదుర్కొన్నానని, అయితే టై బ్రేకర్లో అవకాశంతో నిలబడగలిగానని చెప్పాడు. మరోవైపు సెమీ-ఫైనల్స్లో అలెగ్జాండర్ జ్వెరెవ్తో డొమినిక్ థీమ్ ఆడనున్నాడు. ప్రపంచ ఏడో సీడ్ జ్వెరెవ్ 1-6, 6-3, 6-4, 6-2తో మాజీ చాంపియన్, స్విట్జర్లాండ్ ఆటగాడు స్టాన్ వావ్రింకాను ఓడించి సెమీఫైనల్ చేరుకున్నాడు. ఇక మరో సెమీ-ఫైనల్లో 6 సార్లు ఆస్ట్రేలియన్ ఓపెన్ గ్రాండ్ స్లామ్ ఛాంపియన్ అయిన రోజర్ ఫెదరర్ 7 సార్లు ఆస్ట్రేలియన్ ఓపెన్ను గెలుచుకున్న నోవాక్ జొకోవిచ్తో తలపడనున్నాడు.