బీజేపీ జాతీయ అధ్యక్షుడు జేపీ నడ్డాతో ఈటల రాజేందర్ భేటీ

May 31, 2021

మాజీ మంత్రి ఈటల రాజేందర్‌ సోమవారం నాడు ఢిల్లీలో భారతీయ జనతా పార్టీ జాతీయ అధ్యక్షుడు జేపీ నడ్డాతో భేటీ అయ్యారు. తెలంగాణ రాష్ట్ర మంత్రి వర్గం నుంచి ఇటీవలే ఈటల రాజేందర్ ను తొలగించిన విషయం తెలిసిందే. గత కొన్నిరోజులుగా ఈటల రాజేందర్ బీజేపీ పార్టీలో చేరుతారనే ప్రచారం జరుగుతున్న నేపథ్యంలో జేపీ నడ్డాతో భేటీ ప్రాధానత్య సంతరించుకుంది. ఈ భేటీలో ఈటలతో పాటుగా తెలంగాణ రాష్ట్ర బీజేపీ అధ్యక్షుడు బండి సంజయ్, మాజీ ఎంపీ వివేక్‌, ఎల్లారెడ్డి మాజీ ఎమ్మెల్యే ఏనుగు రవీందర్‌రెడ్డి కూడా పాల్గొన్నట్టు తెలుస్తుంది. పార్టీలో చేరిక, తెలంగాణలో రాజకీయ పరిస్థితులపై చర్చించినట్టు సమాచారం. ఈ భేటీతో బీజేపీలో ఈటల చేరికపై ఓ స్పష్టత వచ్చే అవకాశముందని రాజకీయ విశ్లేషకులు భావిస్తున్నారు.