భారత్ బంద్ నేపథ్యంలో ఓయూ, జేఎన్టీయూ ప‌రిధిలో రేపు జరిగే పరీక్షలు వాయిదా

December 7, 2020

కేంద్రప్రభుత్వం తీసుకొచ్చిన నూతన వ్యవసాయ చట్టాలకు వ్యతిరేకంగా ఆందోళన చేస్తున్న రైతులు డిసెంబర్ 8, మంగళవారం నాడు “భారత్ బంద్” కు పిలుపునిచ్చిన సంగతి తెలిసిందే. ఈ నేపథ్యంలో విద్యార్థుల ఇబ్బందులను దృష్టిలో ఉంచి ఉస్మానియా యూనివర్సిటీ పరిధిలో మంగళవారం నాడు జరిగే పరీక్షలను వాయిదా వేస్తున్నట్టుగా ప్రకటించారు. డిసెంబర్ 9 నుంచి పరీక్షలు యథాతథంగా జరుగుతాయని, వాయిదా వేసిన పరీక్షల నిర్వహణ తేదీలను త్వరలోనే ప్రకటించనున్నట్టు ఓయూ అధికారులు తెలిపారు.

మరోవైపు జేఎన్టీయూ పరిధిలో మంగళవారం నాడు జరగాల్సిన సెమిస్టర్ పరీక్షలను వాయిదా వేస్తున్నామని, ఆ పరీక్షలు డిసెంబర్ 10 న జరుగుతాయని అధికారులు వెల్లడించారు. ఇక తెలంగాణలో రేపు జ‌ర‌గాల్సిన పీజీ కామన్ ఎంట్రన్స్-2020 ప‌రీక్ష‌ల‌ను కూడా ర‌ద్దు చేశారు. వాయిదా పడిన ప్రవేశ పరీక్షల తేదీలను త్వరలోనే వెల్లడించనున్నట్టు సీపీజీసెట్-2020 కన్వీనర్ తెలిపారు.