తమిళనాడు అసెంబ్లీ ఎన్నికల వేళ రాజకీయ సమీకరణాలు వేగంగా మారుతున్నాయి. ‘తమిళగ వెట్రి కళగం’ (టీవీకే) పార్టీ అధ్యక్షుడు, ప్రముఖ సినీ నటుడు విజయ్ తన పార్టీ సంపూర్ణ మ్యానిఫెస్టోను విడుదల చేసి రాజకీయ వర్గాల్లో సంచలనం సృష్టించారు. తిరుక్కురళ్ గ్రంథంలోని ఆదర్శాలను పుణికిపుచ్చుకుని, అమలుకు సాధ్యమయ్యే హామీలతోనే దీనిని రూపొందించామని విజయ్ స్పష్టం చేశారు.
మ్యానిఫెస్టోలో సంక్షేమ పథకాలకు పెద్దపీట
విజయ్ ప్రకటించిన మ్యానిఫెస్టోలో సంక్షేమ పథకాలకు పెద్దపీట వేశారు. ఆకర్షణీయమైన అంశాలను మ్యానిఫెస్టోలో చేర్చారు. ఈ క్రమంలో ప్రధానమంత్రి నరేంద్ర మోదీ నేతృత్వంలోని కేంద్రం అమలు చేస్తున్న పథకాలకు దీటుగా, స్థానిక అవసరాలకు అనుగుణంగా భారీ వరాలను ప్రకటించారు.
మ్యానిఫెస్టో లోని ముఖ్య హామీలు..
- అర్హులైన పేద కుటుంబాలకు ఏడాదికి 6 ఉచిత గ్యాస్ సిలిండర్లు
- 60 ఏళ్లలోపు కుటుంబాన్ని పోషించే గృహిణులకు ప్రతి నెల రూ.2,500
- నిరుపేద యువతుల వివాహానికి 8 గ్రాముల బంగారం
- ప్లస్-2 వరకు చదివే విద్యార్థుల కోసం తల్లుల ఖాతాల్లో ఏటా రూ.15,000
- ప్లస్-2 తర్వాత పీహెచ్డీ వరకు వడ్డీ లేకుండా రూ.20 లక్షల విద్యారుణం
- 29 ఏళ్లు దాటిన నిరుద్యోగ పట్టభద్రులకు నెలకు రూ.4,000
- ప్లస్-2 చదివిన నిరుద్యోగులకు నెలకు రూ.2,500
- విద్యార్థుల కోసం 100 కామరాజర్ స్పెషల్ స్కూళ్లు
- 5 ఎకరాల లోపు భూమి ఉన్న రైతుల పంట రుణాల పూర్తి మాఫీ
- అన్ని జిల్లాల్లో రెసిడెన్షియల్ పాఠశాలలు
- ప్రతి కుటుంబానికి 200 యూనిట్ల ఉచిత విద్యుత్
- కౌలు రైతులు, వ్యవసాయ కూలీలకు ఏటా రూ.10,000
- ప్రతి కుటుంబానికి రూ.25 లక్షల ఆరోగ్య బీమా
- వరికి క్వింటాల్కు రూ.3,500 మద్దతు ధర
- చెరకు టన్నుకు రూ.4,500 మద్దతు ధర
రాష్ట్ర హక్కుల కోసం నిరంతర పోరాటం:
తమిళనాడు అభివృద్ధి కోసం డీఎంకే, ఏఐఏడీఎంకే వంటి ప్రధాన పార్టీలకు ప్రత్యామ్నాయంగా టీవీకే నిలుస్తుందని విజయ్ ధీమా వ్యక్తం చేశారు. అయితే, విజయ్ ప్రకటించిన మ్యానిఫెస్టోలో సంక్షేమానికి పెద్దపీట వేయడం తమిళనాడు ఓటర్లపై ఎలాంటి ప్రభావం చూపుతాయన్నది ఇప్పుడు ఆసక్తికరంగా మారింది.
మరోవైపు విజయ్ రాకతో డీఎంకే ఓట్ల బ్యాంకుకు గండి పడే ప్రమాదం ఉందని కేంద్ర మాజీ మంత్రి అళగిరి కుమార్తె కయల్ విళి హెచ్చరించడం రాజకీయ ప్రాధాన్యత సంతరించుకుంది. విజయ్ను తక్కువగా అంచనా వేయడం డీఎంకేకు నష్టం చేకూరుస్తుందని, ఈసారి హంగ్ ఏర్పడే అవకాశాలు కూడా ఉన్నాయని ఆమె విశ్లేషించారు. సీనియర్ల అనుభవాన్ని ఉపయోగించుకుని స్టాలిన్ జాగ్రత్త పడాలని ఆమె సూచించారు.
విశ్లేషణ:
విజయ్ మ్యానిఫెస్టోలో విద్య, వైద్యం మరియు వ్యవసాయానికి సమాన ప్రాధాన్యత లభించింది. ముఖ్యంగా రూ.25 లక్షల ఆరోగ్య బీమా మరియు విద్యార్థుల తల్లుల ఖాతాల్లో ఏటా రూ.15,000 జమ చేయడం వంటి పథకాలు సామాన్యులను ఆకట్టుకునేలా ఉన్నాయి. అయితే, ఈ భారీ హామీల అమలుకు అవసరమైన ఆర్థిక వనరుల సమీకరణ టీవీకే ముందున్న అతిపెద్ద సవాలుగా కనిపిస్తోంది.
