ఆసియా క్రీడలు-2026లో భారత క్రీడాకారులు పతకాల వేటను కొనసాగిస్తున్నారు. దీనిలో భాగంగా వెన్నం జ్యోతి సురేఖ నేతృత్వంలోని భారత కాంపౌండ్ ఆర్చరీ మహిళల జట్టు ఆసియా క్రీడలు-2026లో సంచలన ప్రదర్శనతో స్వర్ణ పతకాన్ని కైవసం చేసుకుంది. బుధవారం జరిగిన ఉత్కంఠభరిత ఫైనల్ పోరులో చైనాపై గెలుపొంది భారత్కు పసిడి పతకాన్ని అందించింది.
India wins Gold in Compound Women’s Team Archery !!
ఆంధ్రప్రదేశ్కు చెందిన వెన్నం జ్యోతి సురేఖ, తెలంగాణకు చెందిన చికిత, మహారాష్ట్రకు చెందిన ప్రీతిక ప్రదీప్లతో కూడిన భారత కాంపౌండ్ ఆర్చరీ మహిళల జట్టు టోర్నీ ప్రారంభం నుంచే అద్భుతమైన ఫామ్ను కనబరిచింది. సెమీఫైనల్లో బలమైన దక్షిణ కొరియా జట్టును అధిగమించిన భారత బృందం, తుది పోరులోనూ అదే ఆత్మవిశ్వాసాన్ని ప్రదర్శించింది.
ఫైనల్లో చైనా జట్టుతో తలపడిన భారత్ 238-234 తేడాతో ఘనవిజయం సాధించింది. డిఫెండింగ్ ఛాంపియన్స్గా బరిలోకి దిగిన భారత జట్టు తన పసిడి పతకాన్ని విజయవంతంగా నిలబెట్టుకుంది.
చారిత్రక రికార్డు సమం
ఫైనల్ మ్యాచ్లో భారత ఆర్చర్లు నమోదు చేసిన 238 పాయింట్ల స్కోరు ప్రత్యేక ఆకర్షణగా నిలిచింది. 2014 ఆసియా క్రీడల్లో దక్షిణ కొరియా నెలకొల్పిన 238 పాయింట్ల ఆసియా రికార్డును భారత్ ఈ ప్రదర్శనతో సమం చేసింది.
భారత పతకాల పట్టిక
కాగా, తెలుగు క్రీడాకారిణులు జ్యోతి సురేఖ, చికితల ప్రతిభ అంతర్జాతీయ వేదికపై మరోసారి మెరిసి, తెలుగు రాష్ట్రాల క్రీడాభిమానుల్లో సరికొత్త ఉత్సాహాన్ని నింపింది. ఈ విజయంతో ఆసియా క్రీడలు-2026లో భారత్ ఖాతాలో ఏడో స్వర్ణ పతకం చేరింది. ఇప్పటివరకు భారత్ సాధించిన మొత్తం పతకాల సంఖ్య 53కి చేరింది.
