హైదరాబాద్‌లో మూసీ రివర్‌ఫ్రంట్ డెవలప్‌మెంట్ ప్రాజెక్టుపై ప్రజాభిప్రాయ సేకరణ మరియు సమీక్షా సమావేశం సందర్భంగా ప్రతిపక్ష బిఆర్‌ఎస్ నేతలపై పోలీసుల ఆంక్షలు అమలు చేయడంపై బీఆర్‌ఎస్ కార్యనిర్వాహక అధ్యక్షుడు కేటీఆర్ తీవ్ర ఆగ్రహం వ్యక్తం చేశారు. మాజీ మంత్రి పీ. సబితా ఇంద్రారెడ్డి, కార్తీక్ రెడ్డిలను వారి గృహాల వద్ద ముందస్తు గృహ నిర్బంధం చేయడమే కాకుండా, సమావేశానికి వెళ్తున్న ఎల్బీనగర్ ఎమ్మెల్యే సుధీర్ రెడ్డి, ఎమ్మెల్సీ దాసోజు శ్రవణ్ కుమార్‌తో సహా పలువురు బిఆర్‌ఎస్ నాయకులను పోలీసులు అదుపులోకి తీసుకోవడం పట్ల ఆయన విమర్శలు గుప్పించారు.
కాంగ్రెస్ ప్రభుత్వం రాష్ట్రంలో “ఎమర్జెన్సీ” తరహా పాలన సాగిస్తోందని, ప్రజల మరియు ప్రతిపక్షాల గొంతు నొక్కడానికి ప్రయత్నిస్తోందని కేటీఆర్ ధ్వజమెత్తారు. శత్రువుల మాదిరిగా ప్రతిపక్ష నేతల ఇళ్ల వద్ద పోలీసులను మోహరించి వారి హక్కులను హరించడం ప్రజాస్వామ్య విరుద్ధమని ఆయన విమర్శించారు. ముఖ్యమంత్రి రేవంత్ రెడ్డి ప్రజల ప్రయోజనాలను, రైతు సంక్షేమాన్ని పక్కనబెట్టి రూ. 1.5 లక్షల కోట్ల వ్యయంతో మూసీ బ్యూటిఫికేషన్ పేరిట భారీ దోపిడీకి స్కెచ్ వేశారని ఆరోపించారు.
రాష్ట్రంలో తీవ్ర వర్షాభావం, పంట నష్టాలతో రైతాంగం అల్లాడుతుంటే, వారికీ కనీసం ఎకరానికి రూ. 50,000 పరిహారం అందించడం లేదని, కానీ రియల్ ఎస్టేట్ మరియు కమిషన్ వ్యాపారం కోసం వేల కోట్లు కేటాయించడానికి ప్రభుత్వం ఆరాటపడుతోందని కేటీఆర్ ఆరోపించారు. మూసీ పరివాహక ప్రాంతాల్లోని వేలాది కుటుంబాలను రోడ్డున పడేసి, వారి నివాసాలను కూల్చివేసేందుకు ప్రభుత్వం ప్రయత్నిస్తే చూస్తూ ఊరుకోబోమని, బాధిత ప్రజల పక్షాన బిఆర్‌ఎస్ పూర్తిస్థాయిలో పోరాడుతుందని స్పష్టం చేశారు.
అక్రమంగా అరెస్టు చేసిన బిఆర్‌ఎస్ నేతలను తక్షణమే, నిరభ్యంతరంగా విడుదల చేయాలని కేటీఆర్ డిమాండ్ చేశారు. మూసీ రివర్‌ఫ్రంట్ ప్రాజెక్టు పేరిట కాంగ్రెస్ ప్రభుత్వం చేస్తున్న అవినీతి, వినాశకరమైన చర్యలను ప్రజల ముందు ఎండగడతామని ఆయన స్పష్టం చేశారు.
