ఏపీలో మొదటి దశ పంచాయతీ ఎన్నికలు, నేటి నుంచి నామినేషన్లు ప్రారంభం

January 29, 2021

ఆంధప్రదేశ్ రాష్ట్రంలో గ్రామ పంచాయతీ ఎన్నికలకు రంగం సిద్ధమైంది. మొదటి దశ పంచాయతీ ఎన్నికలకు ఈ రోజు నుంచి నామినేషన్ల ఘట్టం మొదలైంది. మొదటి దశలో విజయనగరం జిల్లా మినహా రాష్ట్రవ్యాప్తంగా 3251 పంచాయతీల్లో ఫిబ్రవరి 9 న ఎన్నికలు జరగనున్నాయి. ముందుగా ఏపీ పంచాయతీ రాజ్(ఎన్నికల నిర్వహణ) నియమావళి, 6 వ నియమం కింద రిటర్నింగ్‌ అధికారులు పంచాయతీల వారీగా పారమ్-1 లోని ఎన్నికల నోటీసు జారీచేస్తారు. దీంతో జనవరి 29, 30, 31 తేదీల్లో మూడు రోజుల పాటుగా ప్రతిరోజూ ఉదయం 10.30 గంటల నుంచి సాయంత్రం 5 గంటల మధ్య అభ్యర్థులు నామినేషన్లు దాఖలు చేయవచ్చు. సర్పంచ్‌ పదవికి పోటీచేసే అభ్యర్థులతో పాటుగా వార్డు సభ్యుల పదవులకు కూడా నామినేషన్లు స్వీకరించనున్నారు. మొదటి దశలో భాగంగా 3251 పంచాయతీలు, 32,522 వార్డులకు ఎన్నికలు జరగనున్నాయి.