ఆంధ్రప్రదేశ్ ముఖ్యమంత్రి నారా చంద్రబాబు నాయుడు సింగపూర్ పర్యటనలో ఆ దేశ ప్రభుత్వం ఉన్నత స్థాయి అధికారిక ప్రొటోకాల్ కల్పించి అపూర్వ గౌరవాన్ని అందించింది. సీఎం బస చేసిన హోటల్ నుంచి సింగపూర్ ప్రధాని లారెన్స్ వాంగ్ను కలిసేందుకు వెళ్లే సమయంలో చంద్రబాబు ప్రయాణించే వాహన శ్రేణికి గౌరవ సూచకంగా అక్కడి పోలీస్ యంత్రాంగం ప్రత్యేక ఎస్కార్ట్ సౌకర్యాన్ని ఏర్పాటు చేసింది. ఈ విదేశీ పర్యటనలో భాగంగా సింగపూర్ ప్రధాని అధికారిక నివాసంలో లారెన్స్ వాంగ్తో సీఎం చంద్రబాబు దాదాపు 30 నిమిషాల పాటు మర్యాదపూర్వకంగా భేటీ అయ్యారు.
సమగ్ర పారిశ్రామిక అభివృద్ధి, సాంకేతిక తోడ్పాటుపై చర్చ
ఆంధ్రప్రదేశ్లో సెమీకండక్టర్ల తయారీ ఎకోసిస్టమ్, కెపాసిటీ బిల్డింగ్ రంగాల్లో సింగపూర్ ప్రభుత్వం తగిన తోడ్పాటును అందించాలని ఈ సందర్భంగా చంద్రబాబు కోరారు. వీటితో పాటు క్వాంటం టెక్నాలజీ, ఆర్టిఫిషియల్ ఇంటెలిజెన్స్ (AI), మరియు వివిధ విశ్వవిద్యాలయాల్లో పరిశోధనల విస్తరణకు పరస్పర సహకారం అవసరమని సింగపూర్ ప్రధానికి వివరించారు.
అమరావతి సహా రాష్ట్రంలోని వివిధ ప్రధాన నగరాల పట్టణ ప్రాంతాల్లో ‘అర్బన్ గవర్నెన్స్’ మెరుగుపరచడానికి సింగపూర్ నైపుణ్యాన్ని ఉపయోగించుకోవాలని ఆకాంక్షించారు. ఆంధ్రప్రదేశ్లో ప్రస్తుతం 160 గిగావాట్ల పునరుత్పాదక విద్యుత్ ఉత్పత్తి లక్ష్యంతో గ్రీన్ ఎనర్జీ దిశగా అడుగులు వేస్తున్నామని, భవిష్యత్తులో అమరావతి అత్యంత నివాసయోగ్యమైన నగరాల జాబితాలో చేరబోతోందని ధీమా వ్యక్తం చేశారు.
వ్యవసాయ ఎగుమతులు, మౌలిక వసతుల కల్పన
రాష్ట్రంలో పెద్ద ఎత్తున సాగుతున్న ప్రకృతి వ్యవసాయ ఉత్పత్తులకు అంతర్జాతీయ సర్టిఫికేషన్, ట్రేసబిలిటీ సాధించేందుకు ప్రయత్నిస్తున్నామని సీఎం చంద్రబాబు తెలిపారు. ఏపీకి చెందిన నాణ్యమైన ఉద్యాన, ఆక్వా ఉత్పత్తులను సింగపూర్ దిగుమతి చేసుకునేలా చొరవ చూపాలని విజ్ఞప్తి చేశారు. పోర్టులు, విమానాశ్రయాల అభివృద్ధి మరియు ప్రజారోగ్యానికి సంబంధించిన మౌలిక సదుపాయాల కల్పనలో ఏపీ, సింగపూర్ ఉమ్మడిగా కలిసి పనిచేయాలని కోరారు.
రాజధాని అమరావతిలో అంతర్జాతీయ ప్రమాణాలతో ఏపీ ప్రభుత్వం చేపడుతున్న వివిధ నిర్మాణాల పురోగతి గురించి సింగపూర్ ప్రధాని లారెన్స్ వాంగ్ ఈ సందర్భంగా ప్రత్యేకంగా ఆరా తీసి అభినందించారు.
వ్యూహాత్మక భాగస్వామ్యం, ఎయిర్ కనెక్టివిటీ
పర్యటనలో భాగంగా సింగపూర్ విదేశీ వ్యవహారాల శాఖ మంత్రి వి.వి.ఎన్. బాలకృష్ణన్తో కూడా సీఎం చంద్రబాబు ప్రత్యేకంగా భేటీ అయ్యారు. ఏపీ-సింగపూర్ మధ్య విమాన సర్వీసుల పెంపు, ఎయిర్ కనెక్టివిటీ మెరుగుదలపై ఇరు నేతలు చర్చించారు. తయారీ, సేవా రంగాల్లో ఆంధ్రప్రదేశ్ వేగంగా పురోగమిస్తోందని, పరిశ్రమల స్థాపనకు అవసరమైన భూమి లభ్యతతో పాటు నిపుణులైన మానవ వనరులు రాష్ట్రంలో పుష్కలంగా ఉన్నాయని వివరించారు.
గ్రీన్ అమ్మోనియా, గ్రీన్ హైడ్రోజన్ రంగాల్లో ఏపీ కీలకంగా మారిందని, విశాఖపట్నంలో డేటా సెంటర్ ఎకోసిస్టమ్ అందుబాటులోకి వస్తోందని పేర్కొన్నారు. అమరావతిని ‘క్వాంటం వ్యాలీ’గా తీర్చిదిద్దుతున్నామని, ఉత్తరాంధ్రలో ఆర్సెలార్ మిత్తల్ స్టీల్ప్లాంట్ ఏర్పాటు కాబోతోందని స్పష్టం చేశారు. ఇక ఈ భేటీ ముగింపులో బాలకృష్ణన్ ‘ఫిఫ్టీ సీక్రెట్స్ ఆఫ్ సింగపూర్ సక్సెస్’ అనే పుస్తకాన్ని సీఎం చంద్రబాబుకు బహూకరించారు.
