ప్రపంచ ప్రఖ్యాత ఎలక్ట్రిక్ కార్ల తయారీ సంస్థ టెస్లా (Tesla) సీఈఓ ఎలాన్ మస్క్ మరోసారి టెక్నాలజీ ప్రపంచాన్ని విస్మయపరిచారు. ఎంతో కాలంగా అందరిలోనూ ఉత్కంఠ రేకెత్తిస్తున్న నూతన తరం టెస్లా రోడ్‌స్టర్ (Tesla Roadster) కారును ఆయన అధికారికంగా ఆవిష్కరించారు. సాధారణ రోడ్లపై దూసుకుపోవడమే కాకుండా, ప్రత్యేకమైన రాకెట్ టెక్నాలజీ సహాయంతో గాల్లో ఎగిరే సామర్థ్యం ఉన్న ఈ ఫ్లయింగ్ సూపర్‌కారు ప్రదర్శన ప్రస్తుతం ప్రపంచవ్యాప్తంగా టెక్ వర్గాలను షేక్ చేస్తోంది.
టెక్సాస్‌లోని స్పేస్‌ఎక్స్ (SpaceX) కేంద్రంలో నిర్వహించిన ఈ ప్రత్యేక ఈవెంట్‌లో రోడ్‌స్టర్ కారుకు సంబంధించిన అద్భుతమైన విన్యాసాలను ప్రత్యక్ష ప్రసారం చేశారు. కారు ఒక భారీ వక్ర రాంప్ పైకి అత్యంత వేగంగా దూసుకెళ్లి, తలక్రిందులుగా ప్రయాణించి, ఆపై కొద్దిసేపు గాల్లో తేలి, సురక్షితంగా భూమిపై దిగిన తీరు అందరినీ ఆశ్చర్యపరిచింది. ఈ విన్యాసానికి సంబంధించిన వీడియోను ఎలాన్ మస్క్ ఎక్స్ (X) వేదికగా షేర్ చేస్తూ.. “Turns out the future does have flying cars” (అనుకున్నట్లుగానే భవిష్యత్తులో నిజంగానే ఫ్లయింగ్ కార్లు వచ్చాయి) అంటూ వ్యాఖ్యానించారు.
Turns out the future does have flying cars
— Elon Musk (@elonmusk) View on X
ఈ అద్భుతమైన ఫ్లయింగ్ టెక్నాలజీ వెనుక ఎలాన్ మస్క్‌కు చెందిన అంతరిక్ష పరిశోధనా సంస్థ స్పేస్‌ఎక్స్ సహకారం ఉంది. స్పేస్‌ఎక్స్ రాకెట్లలో ఉపయోగించే ‘కోల్డ్-గ్యాస్ థ్రస్టర్లు’ మరియు హై-ప్రెషర్ గ్యాస్ ట్యాంక్‌లను ఈ కారులో అమర్చారు. ఈ అత్యాధునిక ప్రెషర్ గ్యాస్ సిస్టమ్ ద్వారా ఉత్పత్తి అయ్యే శక్తితో కారు గాల్లోకి ఎగరడం, గాల్లోనే నియంత్రణలో ఉండటం వంటి సాహసోపేత విన్యాసాలు చేయగలుగుతుందని టెస్లా ఇంజనీర్లు వెల్లడించారు.
ఈ సరికొత్త రోడ్‌స్టర్ కేవలం 1 సెకన్ల వ్యవధిలోనే గంటకు 0 నుంచి 60 మైళ్ల వేగాన్ని అందుకోగలదని టెస్లా తెలిపింది. ఈ కారు వాణిజ్య ఉత్పత్తిని 2028 నాటికి ప్రారంభించనున్నట్లు మస్క్ వెల్లడించారు. అయితే, ఈ ఫ్లయింగ్ కారు సాధారణ రహదారులపై ప్రయాణించడానికి చట్టబద్ధత ఉంటుందా అనే ప్రశ్నకు మస్క్ స్పందిస్తూ.. అది మీరు ప్రయాణించే వీధిని బట్టి ఉంటుందని చమత్కరించారు. ఏదేమైనా, సైన్స్ ఫిక్షన్ సినిమాల్లో మాత్రమే చూసిన ఎగిరే కార్లను నిజరూపంలోకి తీసుకువచ్చి మస్క్ మరోసారి తన ప్రత్యేకతను చాటుకున్నారు.
