అసని తుఫానుపై సీఎం జగన్‌ అత్యవసర సమీక్ష.. సహాయక శిబిరాలలో ఉన్న కుటుంబాలకు రూ. 2 వేలు ఆర్ధిక సాయం

May 12, 2022

ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి బుధవారం ‘అసాని’ తుఫానుపై అత్యవసర సమీక్ష జరిపారు. బంగాళాఖాతంలో ఏర్పడిన తుఫాన్ మొదట ఒడిశా వైపు వెళ్తున్నట్లు కనిపించినా, తర్వాత అది దిశ మార్చుకుని ఆంధ్రవైపుగా పయనించటం, విశాఖ-కాకినాడ జిల్లాల మధ్య తీరం దాటుతుందన్న అంచనాల నేపథ్యంలో సీఎం జగన్ ఉన్నతాధికారులతో వీడియో కాన్ఫరెన్స్‌ నిర్వహించారు. సమీక్షలో ముఖ్యమంత్రి మాట్లాడుతూ.. తుపానుపై నిరంతర పర్యవేక్షణ ఉండాలని, ప్రభావిత ప్రాంతాల ప్రజలను సురక్షిత ప్రాంతాలకు తరలించాలని ఆదేశించారు. అలాగే సహాయక శిబిరాలకు తరలించిన కుటుంబాలకు రూ. 2 వేలు తక్షణ ఆర్ధిక సాయం అందించాలని ఆదేశాలు జారీ చేశారు. ఒకే వ్యక్తి ఉన్న నేపథ్యంలో రూ. వెయ్యి అందించాలని చెప్పారు. దీనితో పాటు ఆహారం, రేషన్‌, మందులు సకాలంలో అందేలా చూడాలని సంబంధిత అధికారులకు సూచించారు. సెంట్రల్‌ హెల్ప్‌ లైన్‌తో పాటు, జిల్లాల వారీగా హెల్ప్‌లైన్‌ నంబర్లకు వచ్చే కాల్స్‌ పట్ల వెంటనే స్పందించాలని, తక్షణమే సహాయం అందించాలని ఆదేశించారు.