నేడు యాదాద్రి భువనగిరి జిల్లాలో సీఎం కేసీఆర్ పర్యటన

February 12, 2022

తెలంగాణ రాష్ట్ర ముఖ్యమంత్రి కె.చంద్రశేఖర్‌ రావు శనివారం నాడు యాదాద్రి భువనగిరి జిల్లాలో పర్యటించనున్నారు. ఈ పర్యటనలో భాగంగా ముందుగా యాదాద్రికి చేరుకొని, వీవీఐపీల విడిది కోసం నూతనంగా నిర్మించిన ప్రెసిడెన్షియల్‌ సూట్‌ను ప్రారంభించనున్నారు. అలాగే యాదాద్రిలో యాగశాల నిర్వహణ స్థలాన్ని కూడా సీఎం పరిశీలించనున్నారు. అనంతరం భువనగిరిలో నూతనంగా నిర్మించిన సమీకృత కలెక్టరేట్‌ సముదాయాన్ని ప్రారంభించనున్నారు.

ఈ సందర్భంగా జిల్లా అభివృద్ధిపై అధికారులతో సమీక్ష జరుపనున్నారు. ఇక మధ్యాహ్నం భువనగిరిలో టీఆర్‌ఎస్‌ పార్టీ జిల్లా కార్యాలయ నూతన భవనాన్ని సీఎం ప్రారంభిస్తారు. అనంతరం రాయగిరిలో ఏర్పాటు చేసిన బహిరంగ సభలో సీఎం కేసీఆర్ పాల్గొని ప్రసంగించనున్నారు. సీఎం కేసీఆర్ పర్యటన నేపథ్యంలో జిల్లా మంత్రులు, ఎమ్మెల్యేలు, ఎమ్మెల్సీలు, అధికారులు ఇప్పటికే ఏర్పాట్లను పరిశీలించారు.