ప్రధాన ఎన్నికల కమిషనర్ (CEC) జ్ఞానేశ్ కుమార్‌ను ఉద్దేశించి లోక్‌సభ ప్రతిపక్ష నేత రాహుల్ గాంధీ తీవ్రస్థాయిలో విమర్శలు గుప్పించారు. దిల్లీలో ఇండియా కూటమి ఆధ్వర్యంలో జరుగుతున్న నిరసనల నేపథ్యంలో ఆయన మాట్లాడుతూ — సీఈఐ జ్ఞానేశ్ కుమార్‌కు ప్రస్తుతం రాత్రిపూట నిద్రపట్టడం లేదనే విషయం తమకు బాగా తెలుసని ఎద్దేవా చేశారు. రాజ్యాంగ వ్యవస్థలను అడ్డుపెట్టుకుని ప్రజాస్వామ్యాన్ని అపహాస్యం చేస్తున్న తీరుపై ఆయన మండిపడ్డారు.
ఇదే సమయంలో కేంద్ర ప్రభుత్వంపై కూడా రాహుల్ గాంధీ సంచలన వ్యాఖ్యలు చేశారు. ప్రధాని నరేంద్ర మోదీ సర్కారుపై తీవ్ర విమర్శలు గుప్పిస్తూ.. కేంద్ర ప్రభుత్వానికి మద్దతుగా ఉన్న పలువురు నేతలు, సుమారు 200 మంది కీలక అధికారులు తమతో టచ్‌లో ఉన్నారని పేర్కొన్నారు. సరైన సమయం వచ్చినప్పుడు ఈ ప్రభుత్వానికి వ్యతిరేకంగా పరిణామాలు మారుతాయని, ప్రజాస్వామ్యాన్ని అణచివేసే చర్యలకు పాల్పడుతున్న వారు ఎప్పటికీ అధికారంలో ఉండలేరని హెచ్చరించారు.
ఎన్నికల సంఘం నిష్పక్షపాతంగా వ్యవహరించాలని డిమాండ్ చేస్తూ విపక్షాలు చేపట్టిన ఆందోళనలు జాతీయ స్థాయిలో రాజకీయంగా తీవ్ర చర్చనీయాంశంగా మారాయి. మరోవైపు ఢిల్లీ వేదికగా జరుగుతున్న ఈ రాజకీయ పరిణామాలు జాతీయ స్థాయిలో తీవ్ర సంచలనం సృష్టిస్తున్నాయి. కేంద్ర ప్రభుత్వ తీరును, ఎన్నికల సంఘం పనితీరును నిలదీస్తూ ఇండియా కూటమి చేపట్టిన ఈ ఆందోళనలు కేవలం రాజకీయ పార్టీల మధ్యే కాకుండా, ప్రజాస్వామ్య వ్యవస్థల స్వయంప్రతిపత్తిపై కూడా పెద్దఎత్తున చర్చకు దారితీశాయి.
రానున్న రోజుల్లో ఈ పోరాటాన్ని మరింత ఉధృతం చేసేందుకు విపక్షాలు సన్నద్ధమవుతుండగా, కేంద్రం తీసుకునే నిర్ణయాలు ఎలాంటి పరిణామాలకు దారితీస్తాయనే దానిపై సర్వత్రా ఉత్కంఠ నెలకొంది. అదే సమయంలో, దేశ రాజధానిలో నెలకొన్న ఈ ఉద్రిక్త పరిస్థితుల కారణంగా సామాన్య ప్రజలు, ప్రయాణికులు తీవ్ర ఇబ్బందులను ఎదుర్కొంటున్నారు.
రవాణా వ్యవస్థల నిలిపివేత, మెట్రో స్టేషన్ల మూసివేత మరియు భారీ బందోబస్తు వంటి కఠిన ఆంక్షల వల్ల నిత్య జీవితం స్థంభించిపోయింది. ప్రజాస్వామ్యంలో నిరసన తెలిపే హక్కు అందరికీ ఉందని విపక్షాలు వాదిస్తుండగా, శాంతిభద్రతల పరిరక్షణ కోసమే ఈ చర్యలు చేపట్టామని యంత్రాంతం స్పష్టం చేస్తోంది.
