ఏపీ సీఎం వైఎస్ జగన్ తో ఏటీసీ టైర్స్ డైరెక్ట‌ర్ తోషియో ఫుజివారా, కంపెనీ ప్రతినిధులు భేటీ

June 24, 2022

ఆంధ్రప్రదేశ్ ముఖ్య‌మంత్రి వైఎస్ జ‌గ‌న్‌ మోహ‌న్‌ రెడ్డిని శుక్రవారం తాడేప‌ల్లిలోని క్యాంపు కార్యాల‌యంలో ఏటీసీ టైర్స్ డైరెక్ట‌ర్ తోషియో ఫుజివారా, కంపెనీ ప్ర‌తినిధులు మ‌ర్యాద‌పూర్వ‌కంగా క‌లిశారు. ఈ సంద‌ర్భంగా వారు తమ నూతన ప్లాంట్‌ ప్రారంభోత్సవానికి సీఎం వైఎస్ జగన్ ను ఆహ్వానించారు. విశాఖపట్నం అచ్యుతాపురం వద్ద ఈ ఏడాది ఆగస్టు నెలలో ఏటీసీ టైర్స్‌ తమ నూతన ప్లాంట్‌ ను ప్రారంభించేందుకు సన్నాహాలు చేస్తుంది. అచ్యుతాపురం వద్ద రూ.1,750 కోట్లతో ప్లాంట్‌ ఏర్పాటు చేస్తుండగా, ప్రారంభంలో రోజుకు 135 మెట్రిక్‌ టన్నుల ప్రొడక్షన్‌ కెపాసిటీ, 2 వేల మందికి ఉద్యోగావకాశాలు లభించనున్నాయని తెలిపారు. ప్లాంట్ నిర్మాణం, ఉత్పత్తి, ఉద్యోగ అవకాశాలు సహా పలు అంశాలను కంపెనీ ప్రతినిధులు సీఎం వైఎస్ జ‌గ‌న్‌ కు వివ‌రించారు. ఈ కార్యక్రమంలో ఏపీ పరిశ్రమల శాఖ మంత్రి గుడివాడ అమరనాథ్, పరిశ్రమల శాఖ స్పెషల్‌ సీఎస్‌ కరికాల వలవన్, పలువురు అధికారులు పాల్గొన్నారు.