రేపు విజయవాడలో ‘వాలంటీర్లకు వందనం’ కార్యక్రమం.. ప్రారంభించనున్న సీఎం జగన్‌

May 18, 2023

ఆంధ్రప్రదేశ్ ముఖ్యమంత్రి వైఎస్‌ జగన్‌ మోహన్ రెడ్డి రేపు (శుక్రవారం, మే 19, 2023) విజయవాడలో పర్యటించనున్నారు. పర్యటనలో భాగంగా ఆయన ‘వాలంటీర్లకు వందనం’ కార్యక్రమాన్ని లాంఛనంగా ప్రారంభించనున్నారు. నగరంలోని ఏ ప్లస్‌ కన్వెన్షన్‌ సెంటర్‌‌లో వలంటీర్లకు వందనం కార్యక్రమాన్ని వరుసగా మూడో ఏడాది నిర్వహించనున్నారు. ఈ సందర్భంగా పనితీరులో చక్కని ప్రతిభ చూపించిన ఉత్తమ వాలంటీర్లను నగదు బహుమతితో సీఎం జగన్‌ సత్కరించనున్నారు. కాగా కనీసం ఒక ఏడాది పాటు వలంటీర్‌గా పనిచేస్తూ.. వారిపై ఎలాంటి ఫిర్యాదులు, వివాదాలు లేని వారికి ఈ ఉత్తమ వాలంటీర్ అవార్డును ప్రదానం చేయనున్నారు. ఇక సన్మాన కార్యక్రమం అనంతరం సీఎం జగన్‌ వాలంటీర్లను ఉద్దేశించి ప్రసంగించనున్నారు. ఈ నేపథ్యంలో ఆయన రేపు ఉదయం 10 గంటలకు తాడేపల్లి నివాసం నుంచి బయలుదేరి విజయవాడలోని ఏ ప్లస్‌ కన్వెన్షన్‌ సెంటర్‌‌కు చేరుకోనున్నారు.