జనసేన పార్టీ అధ్యక్షుడు పవన్ కళ్యాణ్ ఫిబ్రవరి 20, గురువారం నాడు ఢిల్లీలో పర్యటించనున్నారు. ఈ పర్యటనలో భాగంగా రెండు ముఖ్యమైన కార్యక్రమాల్లో పాల్గొంటారు. గురువారం ఉదయం కేంద్రీయ సైనిక్ బోర్డు కార్యాలయాన్ని సందర్శిస్తారు. అమర సైనిక వీరుల కుటుంబాల సంక్షేమానికి ప్రకటించిన కోటి రూపాయల విరాళానికి సంబంధించిన చెక్ను ఈ సందర్భంగా సైనికాధికారులకు అందజేస్తారు. డిసెంబర్ 9న మిలటరీ డే సందర్భంగా అమరవీరుల కుటుంబాల సంక్షేమం కోసం పవన్ కళ్యాణ్ ఈ విరాళాన్ని ప్రకటించిన సంగతి తెలిసిందే.
అలాగే మధ్యాహ్నం 3 గంటలకు ఢిల్లీలోని విజ్ఞాన్ భవన్లో జరగనున్న ఇండియన్ స్టూడెంట్స్ పార్లమెంట్ సదస్సులో పాల్గొంటారు. ఈ కార్యక్రమాన్ని కేంద్ర మానవవనరుల శాఖ నిర్వహిస్తుంది. దేశానికి స్వచ్ఛమైన యువ రాజకీయ నాయకత్వాన్ని అందించడానికి ఉద్దేశించిన ఈ కార్యక్రమంలో ముఖ్య అతిథిగా పవన్ కళ్యాణ్ హాజరై ఉపన్యాసిస్తారు. అలాగే ఈ కార్యక్రమ సందర్భంగా పవన్ కళ్యాణ్ గురించి చిత్రీకరించిన ఒక షార్ట్ ఫిలింను కూడా ప్రదర్శించనున్నారు. ఈ సదస్సుకు మేఘాలయ అసెంబ్లీ స్పీకర్ మెత్బా లింగ్లో అధ్యక్షత వహిస్తారు. కేంద్ర మంత్రి స్మృతి ఇరానీ, కాంగ్రెస్ నేత జ్యోతిరాదిత్య సింధియా, తదితరులు ఈ సదస్సుకు హాజరై ప్రసంగించనున్నారు.
[subscribe]