ఏపీలో ‘వీబీ జీ రామ్‌ జీ’ పథకాన్ని ప్రారంభించిన కేంద్రమంత్రి శివరాజ్ సింగ్ చోహన్

ఆంధ్రప్రదేశ్‌లోని తిరుపతి జిల్లా ముక్కావారిపల్లె (ఓబులవారిపల్లె మండలం) వేదికగా దేశవ్యాప్తంగా నూతనంగా రూపకల్పన చేసిన ‘వికసిత్‌ భారత్‌ గ్యారంటీ ఫర్‌ రోజ్‌గార్‌ అండ్‌ అజీవిక మిషన్‌ గ్రామీణ్‌’ (VB-G RAM-G) పథకం జాతీయ స్థాయి ప్రారంభోత్సవం గురువారం ఘనంగా జరిగింది. ఈ చారిత్రాత్మక కార్యక్రమానికి ముఖ్య అతిథిగా విచ్చేసిన కేంద్ర గ్రామీణాభివృద్ధి, వ్యవసాయ శాఖ మంత్రి శివరాజ్ సింగ్ చౌహాన్‌తో కలిసి ముఖ్యమంత్రి, డిప్యూటీ సీఎంలు లబ్ధిదారులకు ఉపాధి కార్డులను పంపిణీ చేశారు. ఈ సందర్భంగా ఈ ముగ్గురు నేతలు గ్రామీణ విప్లవానికి నాంది పలికేలా ప్రసంగించారు. ఈ ముగ్గురు ముఖ్య నేతల ప్రసంగాల వివరాలు ఇక్కడ ఉన్నాయి..

దేశ గ్రామీణ ముఖచిత్రాన్ని మార్చే సరికొత్త యుగానికి నాంది – కేంద్రమంత్రి

ప్రధానమంత్రి నరేంద్ర మోదీ నాయకత్వంలో గ్రామీణ భారతదేశ ముఖచిత్రాన్ని మార్చే సరికొత్త యుగానికి ఈ రోజు నాంది పలికామని కేంద్రమంత్రి శివరాజ్ సింగ్ చౌహాన్ పేర్కొన్నారు. గతంలో ఉన్న ఉపాధి హామీ చట్టాన్ని మరింత పటిష్టం చేస్తూ, గ్రామీణ కార్మికుల ఆత్మగౌరవాన్ని, జీవనోపాధిని కాపాడటమే లక్ష్యంగా ఈ కొత్త చట్టం (VB-G RAM-G Act, 2025) తీసుకువచ్చినట్లు చెప్పారు. ఇకపై గ్రామీణ ప్రాంతాల్లోని అర్హులైన ప్రతి కుటుంబానికి గతంలో ఉన్న 100 రోజులకు బదులుగా, ఏటా 125 రోజుల పాటు ఉపాధి పనులను పొందే చట్టబద్ధమైన హక్కు లభిస్తుందని స్పష్టం చేశారు.

దేశవ్యాప్తంగా కనీస దినసరి కూలీ రేటును రూ. 300లకు పెంచడమే కాకుండా, జాతీయ సగటు వేతనాన్ని 10 శాతానికి పైగా పెంచామని, దీనివల్ల గ్రామీణ ఆర్థిక వ్యవస్థ మరింత బలోపేతం అవుతుందన్నారు. ఈ పథకం ద్వారా గ్రామీణ ప్రాంతాల్లో శాశ్వత ఆస్తుల సృష్టి, నీటి వనరుల సంరక్షణ, మహిళా సాధికారతకు అత్యధిక ప్రాధాన్యత ఇస్తామని, వికసిత్ భారత్ సాధనలో ఇదొక కీలక మైలురాయి అని కేంద్రమంత్రి స్పష్టం చేశారు.

‘స్వర్ణాంధ్రప్రదేశ్’ లక్ష్యాలకు అనుగుణంగా అనుసంధానం – సీఎం చంద్రబాబు

రాష్ట్ర పునర్నిర్మాణంలో మరియు గ్రామీణ ప్రాంతాల సమగ్ర అభివృద్ధిలో కేంద్ర ప్రభుత్వం ప్రవేశపెట్టిన ఈ సరికొత్త ఉపాధి పథకం అత్యంత కీలక పాత్ర పోషిస్తుందని చంద్రబాబు నాయుడు ఆశాభావం వ్యక్తం చేశారు. గత ఐదేళ్లలో నిలిచిపోయిన గ్రామీణ మౌలిక సదుపాయాల కల్పనను మళ్లీ వేగవంతం చేసేందుకు ఈ నిధులు ఉపయోగపడతాయన్నారు. ఆంధ్రప్రదేశ్‌కు ఈ పథకం కింద అత్యధికంగా రూ. 7,707 కోట్ల నిధులను కేటాయించినందుకు కేంద్ర ప్రభుత్వానికి, ప్రధానమంత్రికి కృతజ్ఞతలు తెలిపారు. ఈ ‘వీబీ జీ రామ్ జీ’ పథకం కింద చేపట్టే ప్రతి పనిని ‘స్వర్ణాంధ్రప్రదేశ్’ లక్ష్యాలకు అనుగుణంగా అనుసంధానం చేయాలని అధికారులను ఆదేశించారు.

కేవలం గుంతలు తవ్వడానికే పరిమితం కాకుండా.. గ్రామీణ రోడ్ల నిర్మాణం, చెరువుల పునరుద్ధరణ, వ్యవసాయ ఉత్పాదకతను పెంచే శాశ్వత పనులపై దృష్టి పెట్టాలన్నారు. కూలీలకు రెండు వారాలకు ఒకసారి ఆన్‌లైన్ ద్వారా ఎక్కడా అవినీతి లేకుండా నేరుగా ఖాతాల్లోకి వేతనాలు జమవుతాయని, ఒకవేళ చెల్లింపుల్లో జాప్యం జరిగితే ప్రత్యేక పరిహారం కూడా అందుతుందని సీఎం భరోసా ఇచ్చారు.

గ్రామ స్వరాజ్య సాధన దిశగా ఒక విప్లవాత్మకమైన అడుగు – డిప్యూటీ సీఎం పవన్ కల్యాణ్

గ్రామ స్వరాజ్య సాధన దిశగా ఈ నూతన పథకం ఒక విప్లవాత్మకమైన అడుగు అని పంచాయతీరాజ్, గ్రామీణాభివృద్ధి శాఖ మంత్రి, డిప్యూటీ సీఎం పవన్ కల్యాణ్ అభివర్ణించారు. ఆంధ్రప్రదేశ్‌లోని ప్రతి పల్లెను అభివృద్ధి పథంలో నడిపించడమే తమ ప్రభుత్వ ధ్యేయమని, అందుకోసమే ఈ జాతీయ స్థాయి పథకానికి తిరుపతి జిల్లాలోని ముక్కావారిపల్లెను వేదికగా ఎంచుకోవడం గర్వకారణంగా ఉందన్నారు. దేశంలోనే మూడో అత్యధిక కేటాయింపులుగా ఏపీకి రూ. 7,707 కోట్లు రావడం ద్వారా మన పంచాయతీలకు కొత్త జవజీవాలు వస్తాయని పేర్కొన్నారు.

ప్రతి మండలంలోనూ ప్రణాళికాబద్ధంగా పనులను గుర్తించి, క్షేత్రస్థాయిలో నూటికి నూరు శాతం పారదర్శకతతో ఈ నిధులను ఖర్చు చేస్తామని హామీ ఇచ్చారు. కూలీలకు కల్పించే పనిదినాలను 125 రోజులకు పెంచడం వల్ల వలసలు తగ్గి, గ్రామీణ ప్రజల కొనుగోలు శక్తి పెరుగుతుందని డిప్యూటీ సీఎం ఆశాభావం వ్యక్తం చేశారు.

ఈ సరికొత్త సంస్కరణల ద్వారా దేశవ్యాప్తంగా గ్రామీణ ఉపాధి రంగంలో సరికొత్త అధ్యాయం మొదలైంది. కేంద్ర, రాష్ట్ర ప్రభుత్వాల ఉమ్మడి భాగస్వామ్యంతో పల్లెల రూపురేఖలను మార్చేందుకు అధికారులు సమర్థవంతమైన కార్యాచరణతో ముందుకు సాగుతున్నారు.