పవిత్ర రంజాన్ మాసం ప్రారంభ వేళ తెలంగాణతో పాటు దేశవ్యాప్తంగా ఉన్న ముస్లిం సమాజానికి సీఎం కేసీఆర్ శుభాకాంక్షలు

March 24, 2023

నెలవంక దర్శనంతో ప్రారంభమైన పవిత్ర రంజాన్ మాసాన్ని పురస్కరించుకొని తెలంగాణ రాష్ట్ర ముఖ్యమంత్రి కె.చంద్రశేఖర్ రావు తెలంగాణతో పాటు దేశవ్యాప్తంగా ఉన్న ముస్లిం సమాజానికి శుభాకాంక్షలు తెలిపారు. పరమ పవిత్రమైన రంజాన్ మాసం క్రమశిక్షణ, దాతృత్వం, ధార్మిక చింతనను పెంపొందించి, ఆదర్శవంతమైన జీవితం దిశగా ప్రేరణనిస్తుందని సీఎం కేసీఆర్ అన్నారు. ఖురాన్ ఉద్భవించిన పరమ పవిత్ర మాసంగా భావించే రంజాన్ మాసంలో ఖురాన్ పఠనం, ప్రార్థనలు, ఉపవాస దీక్షలు, జకాత్, ఫిత్రా వంటి ధార్మిక కార్యక్రమాలతో ఆధ్యాత్మికత, జీవిత పరమార్థం అవగాహనలోకి వస్తాయని సీఎం తెలిపారు. పవిత్ర రంజాన్ మాసం ప్రజల జీవితాల్లో వెలుగులు నింపాలనీ, ప్రజలంతా సుఖసంతోషాలతో వర్ధిల్లాలనీ ఈ సందర్భంగా సీఎం కేసీఆర్ ఆకాంక్షించారు.