తెలంగాణ రాష్ట్రంలో ఇకపై ఆయుష్మాన్ భారత్ పథకం అమలు, సీఎం కేసీఆర్ నిర్ణయం

May 19, 2021

తెలంగాణ రాష్ట్రంలో ఇకపై కేంద్ర ప్రభుత్వ పథకమైన ఆయుష్మాన్ భారత్ పథకం అమలు కానుంది. ఈ మేరకు రాష్ట్రంలో ఆయుష్మాన్ భారత్ విధివిధానాలను తెలంగాణ ప్రభుత్వం ఖరారు చేసింది. ఈ మేరకు మంగళవారం నాడు ప్రభుత్వం ఒక ప్రకటన విడుదల చేసింది. “కేంద్ర ప్రభుత్వం అమలు పరుస్తున్న ఆయుష్మాన్ భారత్ (ప్రధానమంత్రి జన ఆరోగ్య యోజన) పథకంలో చేరాలని ముఖ్యమంత్రి కె.చంద్రశేఖర్ రావు నిర్ణయించిన నేపథ్యంలో, రాష్ట్ర వైద్యారోగ్యశాఖ, నేషనల్ హెల్త్ అథారిటీతో ఎంవోయు కుదుర్చుకున్నది. తదనుగుణంగా ఆయుష్మాన్ భారత్ పథకం అమలుకు సంబంధించిన విధి విధానాలను రాష్ట్ర వైద్యారోగ్య శాఖ ఖారారు చేసింది. దీని ప్రకారం నియమ నిబంధనలను అనుసరిస్తూ రాష్ట్రంలో ప్రభుత్వ వైద్య సేవలు అందించాలని వైద్యారోగ్యశాఖ అధికారులను సీఎం కేసీఆర్ ఆదేశించారు. ఈమేరకు ఆరోగ్యశాఖ సెక్రటరీ రిజ్వీ, రాష్ట్ర ఆరోగ్యశ్రీ హెల్త్ కేర్ ట్రస్టు సీఈవోకు అమలుకు సంబంధించిన ఉత్తర్వులను జారీ చేశారు” అని ప్రకటనలో పేర్కొన్నారు.