సీఎం జగన్‌ బెయిల్‌ రద్దుపై ఎంపీ రఘురామ కృష్ణంరాజు పిటిషన్‌ కొట్టేసిన సీబీఐ కోర్టు

September 16, 2021

ఏపీ సీఎం వైఎస్ జగన్ మోహన్ రెడ్డి, రాజ్యసభ ఎంపీ విజయసాయి రెడ్డిల బెయిల్ రద్దు చేయాలని కోరుతూ ఎంపీ రఘురామ కృష్ణంరాజు సీబీఐ కోర్టులో పిటిషన్ దాఖలు చేసిన సంగతి తెలిసిందే. సీబీఐ కోర్టులో ఈ పిటిషన్ పై పలు విడతలుగా సుదీర్ఘ విచారణ జరగగా ఇరువర్గాలు వారు వాదనలు వినిపించారు. బెయిల్ విషయంలో ఎలాంటి నిబంధనలు ఉల్లంఘించలేదని, వ్యక్తిగత, రాజకీయ ప్రయోజనాల కోసమే ఈ పిటిషన్ దాఖలు చేయబడిందని సీఎం జగన్ తరపు న్యాయవాదులు కోర్టులో వాదనలు వినిపించారు. ఇప్పటికే విచారణ పూర్తయిన నేపథ్యంలో బుధవారం నాడు ఎంపీ రఘురామ కృష్ణంరాజు దాఖలు చేసిన పిటిషన్ ను కొట్టివేస్తూ సీబీఐ కోర్టు తీర్పు వెలువరించింది. కాగా ఈ అంశంలో సీబీఐ కోర్టు తీర్పుపై హైకోర్టులో రివ్యూ పిటీషన్ వేయనున్నట్టు ఎంపీ రఘురామకృష్ణంరాజు తెలిపారు.