మరికాసేపట్లో ఏపీలో నూతన మంత్రుల ప్రమాణస్వీకారం, అన్ని ఏర్పాట్లు పూర్తి

April 11, 2022

ఆంధ్రప్రదేశ్ రాష్ట్రంలో మరికాసేపట్లో కొత్త కేబినెట్ కొలువు తీరనుంది. వెలగపూడిలోని రాష్ట్ర సచివాలయం పక్కన ఉన్న స్థలంలో సోమవారం ఉదయం 11.31 గంటలకు మంత్రుల ప్రమాణస్వీకార కార్యక్రమం జరగనుంది. రాష్ట్ర గవర్నర్ బిశ్వభూషణ్ హరిచందన్ కొత్త మంత్రులచేత ప్రమాణస్వీకారం చేయించనున్నారు. మంత్రుల ప్రమాణ స్వీకారం అనంతరం తేనీటి విందు జరగనుంది. ఈ కార్యక్రమం కోసం అధికారులు ఇప్పటికే అన్ని ఏర్పాట్లను పూర్తి చేశారు. పాస్‌ల పంపిణీ కూడా పూర్తికాగా, సుమారు 5 వేల మంది ఈ కార్యక్రమానికి హాజరుకానున్నట్టు తెలుస్తుంది.

కొత్త కేబినెట్ లో మొత్తం 25 మందికి ఏపీ ముఖ్యమంత్రి వైఎస్ జగన్ మోహన్ రెడ్డి చోటు కల్పించారు. అయితే 25 మందిలో గతంలో పనిచేసిన 11 మంది మంత్రులకు మరోసారి అవకాశం ఇచ్చారు. ఇప్పటివరకు రాష్ట్రమంత్రివర్గంలో ఉన్న పెద్దిరెడ్డి రామచంద్రారెడ్డి, బొత్స సత్యనారాయణ, అంజాద్‌ భాషా, బుగ్గన రాజేంద్రనాథ్‌ రెడ్డి, గుమ్మనూరు జయరాం, నారాయణస్వామి, పినిపె విశ్వరూప్‌, తానేటి వనిత, సీదిరి అప్పలరాజు, చెల్లుబోయిన వేణుగోపాలకృష్ణ, ఆదిమూలపు సురేష్‌ వంటి వారిని మళ్ళీ కొనసాగించారు.

అలాగే కొత్తగా మరో 14 మందికి సీఎం వైఎస్ జగన్ మంత్రులుగా అవకాశం కల్పించారు. 70 శాతం మంత్రి పదవులు ఎస్సీ, ఎస్టీ, బీసీ, మైనార్టీలకే దక్కాయి. కొత్త కేబినెట్ లో 10 మంది బీసీ, ఐదుగురు ఎస్సీ, ఒకరు ఎస్టీ, ఒకరు మైనార్టీ, నలుగురు కాపు, నలుగురు రెడ్డి సామాజిక వర్గానికి చెందిన వారు ఉన్నారు. అయితే కమ్మ సామాజిక వర్గం నుంచి ఎవరికీ చోటుదక్కలేదు.