గ్రూప్‌-1 మెయిన్స్‌ పరీక్షలకు అన్ని ఏర్పాట్లు సిద్ధం, తేదిలివే…

December 13, 2020

రాష్ట్రంలో గ్రూప్‌-1 మెయిన్స్ పరీక్షలకు అన్ని ఏర్పాట్లు చేసినట్లు ఆంధ్రప్రదేశ్ పబ్లిక్ సర్వీస్ కమిషన్(ఏపీపీఎస్సీ) కార్యదర్శి పీఎస్సార్‌ ఆంజనేయులు వెల్లడించారు. షెడ్యూల్ ప్రకారం డిసెంబర్ 14 నుంచి డిసెంబర్ 20 వరకు పరీక్షలు జరగనున్నాయని తెలిపారు. ఈ పరీక్షల కోసం ఏపీలో 13 జిల్లాలతో పాటుగా హైదరాబాద్ లో మొత్తం 41 పరీక్ష కేంద్రాల్లో ఏర్పాట్లు చేసినట్లు చెప్పారు. మెయిన్స్‌కు అర్హత సాధించిన మొత్తం 9,679 మంది అభ్యర్థులు పరీక్షలకు హాజరుకానుండగా ఇప్పటికి 8099 మంది అభ్యర్థులు డౌన్‌లోడ్ చేసుకున్నారన్నారు. ఈ పరీక్షలు ఉదయం 10 గంటల నుంచి మధ్యాహ్నం ఒంటి గంటవరకు జరగనుండగా, ఉదయం 8:45 గంటల నుంచి 9:30 గంటల మధ్య మాత్రమే అభ్యర్థులను పరీక్షా కేంద్రాల్లోకి అనుమతించనున్నట్టు పేర్కొన్నారు.

పరీక్షలకు హాజరయ్యే అభ్యర్థులు తప్పనిసరిగా హాల్‌ టికెట్‌ తో పాటుగా ఏదైనా ఒక గుర్తింపు కార్డు తీసుకొని రావాలని ‌ సూచించారు. ఇక ప్రశ్నపత్రం ఇంగ్లీష్/తెలుగు వెర్షన్ లలో టాబ్ ద్వారా అందించబడుతుందని చెప్పారు. ట్యాబ్‌ ద్వారా పరీక్ష రాసే విధానానికి సంబంధిన డెమో వీడియోను ఏపీపీఎస్సీ అధికారిక వెబ్‌సైట్‌ (https://psc.ap.gov.in/) లో‌ అందుబాటులో ఉంచారు. కరోనా నేపథ్యంలో పరీక్షలకు హాజరయ్యే అభ్యర్థులు అన్ని నిబంధనలు పాటించాలని సూచించారు.