‘కొరోనిల్‌’ పేరుతో కరోనాకు పతంజలి ఆయుర్వేద మందు, విడుదల చేసిన బాబా రాందేవ్

June 23, 2020

ప్రస్తుతం ప్రపంచంలో పలు దేశాలను కోవిడ్-19 (కరోనా వైరస్) వణికిస్తున్న సంగతి తెలిసిందే. ఈ నేపథ్యంలో ప్రపంచవ్యాప్తంగా పలు ఫార్మా కంపెనీలు వ్యాక్సిన్ తయారీలో నిమగ్నమయ్యాయి. కాగా ఇటీవలే భారత ఫార్మా దిగ్గజ కంపెనీ గ్లెన్‌ మార్క్ కరోనా నియంత్రణకు ‌ఫవిపిరవిర్‌ ఔషధం విడుదలకు అనుమతి సాధించింది. ఈ క్రమంలో తాజాగా ప్రముఖ దేశీయ ఆయుర్వేద కంపెనీ పతంజలి కూడా కరోనాకు మందు కనిపెట్టినట్టు పేర్కొంది.

‘కొరోనిల్‌’ పేరుతో ఈ ఆయుర్వేద మందును మార్కెట్‌లోకి తీసుకువస్తున్నట్లు పతంజలి సహ వ్యవస్థాపకులు బాబా రాందేవ్‌ ప్రకటించారు. జూన్ 23, మంగళవారం నాడు హారిద్వార్‌లోని యోగ్‌పీఠ్‌లో ఈ మందును బాబా రాందేవ్‌ ఆవిష్కరించారు. ఆయుర్వేదంతో కరోనాను నయం చేయవచ్చని, ఈ మందు తీసుకురావడానికి మా శాస్త్రవేత్తలు ఏంతో కృషి చేశారని బాబా రాందేవ్‌ పేర్కొన్నారు. అలాగే ‘కొరోనిల్’ మందు ద్వారా 5 నుంచి 14 రోజుల్లో కరోనాను నయం చేయవచ్చని పతంజలి సంస్థ ప్రకటించింది.