బీసీసీఐ కొత్త కాంట్రాక్ట్స్ : కోహ్లీ, రోహిత్‌, బుమ్రాకు ఏ+, సీ గ్రేడ్ కు పడిపోయిన హార్ధిక్ పాండ్యా

March 3, 2022

భారత క్రికెట్‌ నియంత్రణ మండలి (బీసీసీఐ) 2021–2022 సీజన్‌ కు సంబంధించి ఆటగాళ్ల కొత్త కాంట్రాక్ట్‌లను ప్రకటించింది. మార్చి 2, బుధవారం నాడు జరిగిన బీసీసీఐ అపెక్స్ కౌన్సిల్ సమావేశంలో కాంట్రాక్ట్‌లపై నిర్ణయం తీసుకున్నారు. ఏ+, ఏ, బీ, సీ గ్రేడ్ల కింద మొత్తం 27 మంది ఆటగాళ్ల వార్షిక వేతనాల కాంట్రాక్టులను బీసీసీఐ నిర్ణయించింది. ఏడాదికి రూ.7 కోట్లు చొప్పున చెల్లించే ఏ+ గ్రేడ్ లో కెప్టెన్‌ రోహిత్‌ శర్మ, విరాట్‌ కోహ్లీ, పేస్ బౌలర్‌ జస్ప్రీత్‌ బుమ్రా ఉన్నారు. ఇక ఏ గ్రేడ్‌ కింద రూ.5 కోట్లు, బీ గ్రేడ్‌ కింద రూ.3 కోట్లు, సీ గ్రేడ్ కింద‌ రూ.కోటి చొప్పున ఆటగాళ్లకు చెల్లించనున్నట్టు బీసీసీఐ ప్రకటించింది.

అయితే గత ఏడాది ‘ఏ’ కాంట్రాక్ట్ లో ఉన్న హార్ధిక్ పాండ్యా, ఓపెనర్ శిఖర్ ధావన్ ను ‘సీ’ కేటగిరికి మార్చారు. అలాగే టెస్టు స్పెషలిస్ట్‌లు చటేశ్వర్ పుజారా, రహానే, ఇషాంత్‌ శర్మలను ‘ఏ’ నుంచి ‘బీ’ గ్రేడ్‌ కు మార్చారు. ఇక మయాంక్ అగర్వాల్, కీపర్ వృద్ధిమాన్ సాహా, భువనేశ్వర్‌ కుమార్‌ లను కూడా ‘బీ’ నుంచి ‘సీ’కి మార్చగా, కాంట్రాక్ట్‌ జాబితా నుంచి కుల్దీప్‌ యాదవ్, నవదీప్‌ సైనీలను తప్పించారు.