‘మా’ అధ్యక్ష ఎన్నికలు: 27 మందితో ప్యానెల్ ప్రకటించిన నటుడు ప్రకాశ్‌ రాజ్‌

June 25, 2021

తెలుగు సినీపరిశ్రమలో మూవీ ఆర్టిస్ట్స్‌ అసోసియేషన్ (మా) ఎన్నికల సందడి మొదలైంది. ఈసారి మా అధ్యక్ష పదవికోసం మరింతమంది ప్రముఖ నటులు బరిలోకి దిగనుండడంతో రోజురోజుకి ఈ ఎన్నికలు ఆసక్తికరంగా మారుతున్నాయి. విలక్షణ నటుడు ప్రకాశ్‌ రాజ్‌, హీరో మంచు విష్ణు, నటి జీవిత రాజశేఖర్, నటి హేమ మా అధ్యక్ష ఎన్నికల బరిలోకి దిగనుండడంతో చతుర్ముఖ పోటీ నెలకుంది. ఈ నేపథ్యంలో ముందుగా నటుడు ప్రకాశ్ రాజ్ 27 మందితో కూడిన ప్యానెల్ ను ప్రకటించారు.

“త్వ‌ర‌లో జ‌ర‌గ‌బోయే ఎల‌క్ష‌న్స్‌ని పుర‌స్క‌రించుకుని, ‘మా’ శ్రేయ‌స్సు దృష్ట్యా నిర్మాణాత్మ‌క ఆలోచ‌న‌ల‌ని ఆచ‌ర‌ణ‌లో పెట్టే దిశ‌గా మా ప్ర‌తిష్ట‌కోసం, మ‌న న‌టీ నటుల బాగోగుల కోసం, సినిమా న‌టీన‌టులంద‌రి ఆశీస్సుల‌తో, అండ‌దండ‌ల‌తో ఎన్నిక‌ల‌లో నిల‌బ‌డటం కోసం, ప‌ద‌వులు కాదు ప‌నులు మాత్ర‌మే చేయ‌డం కోసం, ‘మా’ టీంతో రాబోతున్న విష‌యాన్ని తెలియ‌ప‌రుస్తున్నాం” అని ప్రకాశ్ రాజ్ ప్రకటనలో పేర్కొన్నారు.