గ్రేటర్‌ హైదరాబాద్‌ మున్సిపల్‌ కార్పొరేషన్‌ (జీహెచ్‌ఎంసీ) ప్రస్తుత పాలకమండలి పదవీకాలం ఫిబ్రవరి 10తో ముగియనున్న సంగతి తెలిసిందే. ఈ నేపథ్యంలో జీహెచ్‌ఎంసీ మేయర్ మరియు డిప్యూటీ మేయర్ పరోక్ష ఎన్నికకు సంబంధించి శుక్రవారం నాడు తెలంగాణ రాష్ట్ర ఎన్నికల సంఘం నోటిఫికేషన్ విడుదల చేసింది. ఫిబ్రవరి 11 వ తేదీ మధ్యాహ్నం 12.30 గంటలకు మేయర్ ఎన్నిక, ఆ తర్వాత వెంటనే డిప్యూటీ మేయర్ ఎన్నిక చేపట్టనున్నట్లు తెలిపారు. ముందుగా ఫిబ్రవరి 11 ఉదయం 11.00 గంటలకు ఇటీవల 150 డివిజన్లకు కొత్తగా ఎన్నికైన అభ్యర్థులతో ప్రమాణస్వీకారం చేయించనున్నారు.
మరోవైపు ఏదైనా కారణాల చేత ఫిబ్రవరి 11 న మేయర్, డిప్యూటీ మేయర్ ఎన్నిక నిర్వహించలేకపొతే, మరుసటి రోజైన ఫిబ్రవరి 12న ఎన్నిక జరుగుతుందని ఎన్నికల సంఘం ప్రకటించింది. గత డిసెంబర్ 1 న జీహెచ్‌ఎంసీ ఎన్నికలు జరగగా, డిసెంబర్ 4 న ఎన్నికల ఫలితాలు వెలువడ్డాయి. 150 డివిజన్లలో టీఆర్‌ఎస్‌ 56, బీజేపీ 48, ఎంఐఎం 44, కాంగ్రెస్ పార్టీ 2 గెలుచుకున్నాయి. ఎన్నికల్లో గెలుపొందిన అభ్యర్థుల పేర్లతో ఇటీవలే రాష్ట్ర ఎన్నికల సంఘం గెజిట్‌ నోటిఫికేషన్ జారీ చేసింది. తాజాగా మేయర్, డిప్యూటీ మేయర్ ఎన్నిక కోసం కూడా నోటిఫికేషన్ విడుదలైంది.
మ్యాంగో న్యూస్ లింక్స్:
టెలీగ్రామ్ : https://t.me/mangonewsofficial
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xEYFJ
