ఆరోగ్య రక్షణ మరియు క్యాన్సర్ అవగాహనపై చిరంజీవి ప్రత్యేకంగా ప్రసంగిస్తూ, ప్రతీ ఒక్కరూ క్యాన్సర్ మహమ్మారిపై అవగాహన కలిగి ఉండాలని పిలుపునిచ్చారు. వ్యాధిని ప్రారంభ దశలోనే గుర్తిస్తే దానిని సమర్థవంతంగా జయించవచ్చని స్పష్టం చేశారు. ప్లాస్టిక్ వినియోగానికి దూరంగా ఉండాలని, ప్రకృతిసిద్ధమైన జీవనశైలిని అలవర్చుకోవాలని ఆయన హితవు చెప్పారు.
వైద్య విద్యార్థులు నిరంతర అభ్యాసం, క్రమశిక్షణతో పాటు సమాజం పట్ల బాధ్యత కలిగి ఉండాలని సూచించారు. ఆరోగ్య మంత్రి సత్యకుమార్ యాదవ్ ఆధ్వర్యంలో రాష్ట్రంలో వైద్యారోగ్య రంగం మరింత బాగుపడుతోందని, ప్రజలందరికీ మెరుగైన వైద్యం అందుతోందని అభిప్రాయపడ్డారు.
ఈ కార్యక్రమంలో పాల్గొన్న ఏఐజీ ఆసుపత్రుల ఛైర్మన్ డాక్టర్ డి. నాగేశ్వరరెడ్డి మాట్లాడుతూ, ఆధునిక జీవనశైలి మార్పుల వల్ల 40 ఏళ్ల లోపు యువతలో కూడా క్యాన్సర్, ఊబకాయం, మధుమేహం వంటి సమస్యలు పెరుగుతుండటం ఆందోళనకరమని అన్నారు. ప్రాసెస్డ్ ఫుడ్, ప్రిజర్వేటివ్స్ ఉన్న ఆహారాలకు దూరంగా ఉండి, ఇంట్లో వండిన స్వచ్ఛమైన ఆహారాన్ని తీసుకోవడమే ఆరోగ్యానికి శ్రీరామరక్ష అని హితవు చెప్పారు.
సినీనటుడు చిరంజీవి ఇప్పటికీ అంతే ఉత్సాహంతో, ఫిట్‌గా ఉండటానికి ఆయన పాటించే ఆహార నియమాలు, క్రమశిక్షణతో కూడిన వ్యాయామాలే కారణమని ఉదహరించారు. ఈ కార్యక్రమంలో మాజీ ఎంపీ మురళీమోహన్, ఎమ్మెల్యేలు కామినేని శ్రీనివాస్, వేగుళ్ల జోగేశ్వరరావు, నల్లమిల్లి రామకృష్ణారెడ్డి, జీఎస్‌ఎల్ ఛైర్మన్ డాక్టర్ గన్ని భాస్కరరావు తదితర ప్రముఖులు పాల్గొన్నారు.
