తిరుపతి నగరాన్ని ఆధ్యాత్మిక, పర్యాటక, ఆర్థిక కేంద్రంగా అభివృద్ధి చేసే లక్ష్యంతో ఆంధ్రప్రదేశ్‌ ప్రభుత్వం కీలక ప్రాజెక్టులకు శ్రీకారం చుట్టింది. తిరుపతి అర్బన్‌ డెవలప్‌మెంట్‌ అథారిటీ (తుడా) పరిధిలో రూ.3,222 కోట్ల విలువైన అభివృద్ధి పనులకు ముఖ్యమంత్రి చంద్రబాబు నాయుడు సోమవారం అమరావతి సచివాలయం నుంచి వర్చువల్‌గా శంకుస్థాపన చేశారు. ఈ సందర్భంగా శ్రీవారి భక్తులకు ఉపయోగపడేలా ‘వేంకటాద్రి’ యాప్‌ను ఆవిష్కరించారు.
‘వేంకటాద్రి’ యాప్ విశేషాలు
తిరుమల శ్రీవారి దర్శనార్థం విచ్చేసే లక్షలాది మంది భక్తుల సౌకర్యార్థం తిరుమల తిరుపతి దేవస్థానం (టీటీడీ) అత్యాధునిక సాంకేతిక పరిజ్ఞానంతో రూపొందించిన ‘వేంకటాద్రి’ నావిగేషన్ మొబైల్ అప్లికేషన్‌ను అందుబాటులోకి తీసుకువచ్చింది. తిరుమలలో మ్యాప్ చేసిన 100కు పైగా ముఖ్యమైన ప్రదేశాలకు భక్తులు ఎలాంటి ఇబ్బంది లేకుండా సులభంగా చేరుకోవడానికి ఈ యాప్ ఎంతోగానూ ఉపయోగపడనుంది. ప్రస్తుతం ఈ యాప్‌ను ఆండ్రాయిడ్ గూగుల్ ప్లేస్టోర్ నుంచి డౌన్‌లోడ్ చేసుకోవచ్చని, త్వరలోనే యాపిల్ ఐఓఎస్ (iOS) వినియోగదారులకు కూడా అందుబాటులోకి తేనున్నట్లు టీటీడీ వెల్లడించింది.
ఈ యాప్ యొక్క అత్యంత కీలకమైన ప్రత్యేకత ఏమిటంటే.. సిగ్నల్స్ లేని ప్రాంతాల్లో లేదా ఇంటర్నెట్ కనెక్షన్ సరిగ్గా లేకపోయినా ఇది పూర్తిగా ఆఫ్‌లైన్ నావిగేషన్ విధానంలో జీపీఎస్ ద్వారా సమర్థవంతంగా పనిచేస్తుంది. కొండపై కొలువై ఉన్న శ్రీవారి ఆలయం, దర్శన క్యూలైన్లు, లడ్డూ ప్రసాదం కౌంటర్లు, అక్షయ పాత్ర అన్నప్రసాద కేంద్రాలు, విశ్రాంతి గదులు, కళ్యాణకట్టలు, తాగునీటి కేంద్రాలు, అశ్విని ఆసుపత్రులు మరియు ఉచిత బస్సు సర్వీసు పాయింట్లను ఈ యాప్ ద్వారా సులభంగా గుర్తించవచ్చు.
అంతేకాకుండా, భక్తులకు మార్గదర్శనం చేసేందుకు ఆర్టిఫిషియల్ ఇంటెలిజెన్స్ (AI) సాంకేతికతతో కూడిన ‘గోవింద’ వాయిస్ అసిస్టెంట్ సౌకర్యాన్ని కూడా ఇందులో పొందుపరిచారు. భక్తులు తాము పార్క్ చేసిన వాహనాల వద్దకు సులభంగా చేరుకోవడానికి ‘మార్క్ మై స్పాట్’ ఫీచర్ ఎంతో సహాయపడుతుంది. తిరుమలలో అక్టోబర్ 12 నుండి ప్రారంభమైన నవరాత్రి బ్రహ్మోత్సవాల వేళ వివిధ రోజుల్లో జరిగే వాహన సేవల సమగ్ర సమాచారాన్ని కూడా ఈ యాప్‌లో నిక్షిప్తం చేసినట్లు అధికారులు తెలిపారు.
రెండేళ్లలో పిలిగ్రిమ్‌ టౌన్‌షిప్‌ పూర్తి
భక్తులకు మెరుగైన వసతి, రవాణా, ఇతర సౌకర్యాలు కల్పించేందుకు రూ.2,750 కోట్లతో చేపట్టనున్న ఇంటిగ్రేటెడ్‌ పిలిగ్రిమ్‌ టౌన్‌షిప్‌ను రెండేళ్లలో పూర్తి చేయాలని అధికారులను చంద్రబాబు ఆదేశించారు. నిర్ణయించిన గడువును దృష్టిలో పెట్టుకుని పనులు ప్రారంభించాలని, కేవలం డబ్బు కోసమే కాకుండా భక్తితో పనిచేసే నిర్మాణ సంస్థలకు ప్రాధాన్యం ఇవ్వాలని సూచించారు. టౌన్‌షిప్‌లో తిరుమల తరహా పవిత్ర వాతావరణం ఉండాలని స్పష్టం చేశారు.
క్లీన్‌ అండ్‌ గ్రీన్‌ సిటీగా..
తిరుపతి నుంచి రేణిగుంట వరకు విద్య, వైద్యం, పరిశ్రమల అభివృద్ధితోపాటు పచ్చదనానికి ప్రాధాన్యం ఇవ్వాలని సీఎం సూచించారు. టీటీడీ ఉద్యోగుల ఆత్మగౌరవానికి అనుగుణంగా ఆధునిక నివాస సముదాయాన్ని అభివృద్ధి చేయాలని చెప్పారు. గోశాలలను సేవా అనుభవ కేంద్రాలుగా తీర్చిదిద్దడం, చెరువులను అనుసంధానించడం, ప్రకృతి మధ్య ప్రజలు ప్రశాంతంగా గడిపే సౌకర్యాలు కల్పించాలని సూచించారు.
ఆధ్యాత్మికతకు సాంకేతికతను జోడించడం ద్వారా భక్తులకు మెరుగైన అనుభవం అందించవచ్చని చంద్రబాబు పేర్కొన్నారు. తిరుపతిలో ఆర్థిక కార్యకలాపాలు పెరిగేలా స్థానిక యువతకు నైపుణ్య శిక్షణ, ఉపాధి అవకాశాలు కల్పించాలని అధికారులకు దిశానిర్దేశం చేశారు. ఈ కార్యక్రమంలో టీటీడీ చైర్మన్‌ బీఆర్‌ నాయుడు, ఈవో ఎం. రవిచంద్ర, జిల్లా కలెక్టర్‌, తుడా అధికారులు పాల్గొన్నారు.
