ఏపీ ఈఏపీ సెట్‌ (EAPCET) షెడ్యూల్‌ విడుదల చేసిన విద్యాశాఖ మంత్రి ఆదిమూలపు సురేష్‌

March 24, 2022

ఆంధ్రప్రదేశ్ రాష్ట్రంలో ఇంజనీరింగ్ పరీక్షల షెడ్యూల్‌కి సంబంధించి విద్యాశాఖ మంత్రి ఆదిమూలపు సురేష్‌ కీలక ప్రకటన చేశారు. ఏపీలో ఇంజనీరింగ్, అగ్రికల్చర్, ఫార్మసీ కోర్సుల్లో ప్రవేశాల కోసం EAPCET అనే కామన్ ఎంట్రన్స్ ఎగ్జామ్‌‌ను నిర్వహిస్తున్న విషయం తెలిసిందే. ఈరోజు ఈ ఎగ్జామ్స్ షెడ్యూల్‌ను మంత్రి ఆదిమూలపు సురేష్ విడుదల చేశారు. జులై 4వ తేదీ నుంచి 8వ తేదీ వరకు అయిదు రోజులపాటు ఏపీలో ఇంజనీరింగ్ స్ట్రీమ్‌ ఎంసెట్‌-2022 పరీక్ష, బీ ఫార్మసీకు సంబంధించి ఎంట్రన్స్ టెస్ట్‌లు జరుగుతాయని, అలాగే 11, 12వ తేదీల్లో అగ్రికల్చర్ కోర్సులో ప్రవేశానికి సంబంధించి ఎగ్జామ్ జరుగుతుందని తెలిపారు. ఈ పరీక్షల నిర్వహణ కోసం 136 సెంటర్లను ఏర్పాటు చేసినట్లు పేర్కొన్నారు. అవసరమైతే సెంటర్ల సంఖ్య పెంచుతామని మంత్రి సురేష్‌ స్పష్టం చేశారు.

అయితే ఈ ఎగ్జామ్స్ కోసం తెలంగాణలో కూడా నాలుగు సెంటర్లను ఏర్పాట్లు చేస్తున్నట్లు వెల్లడించారు. దీనికి సంబంధించి ఏప్రిల్ 11 న నోటిఫికేషన్ వస్తుందని చెప్పారు. పరీక్షల నిర్వహణలో కోవిడ్ నిబంధనలు అమలు చేస్తామని తెలియజేశారు. ఎగ్జామినేషన్ ప్యాట్రన్, ర్యాంకింగ్ ప్యాట్రన్స్‌ లో ఎలాంటి మార్పులు చేయడం లేదని విద్యార్థులకు తెలిపారు. కాగా ఈ పరీక్షల ఫలితాలు ఆగస్టు 15వ తేదీ నాటికి వెలువడేలా కార్యాచరణ రూపొందిస్తున్నట్లు చెప్పారు. సెప్టెంబర్‌లో కౌన్సిలింగ్‌ నిర్వహించనున్నట్టు పేర్కొన్నారు. సెప్టెంబర్ రెండో వారం నుంచి తరగతులు ప్రారంభం అవుతాయని అన్నారు. టెన్త్ , ఇంటర్ పరీక్షల షెడ్యూల్ ఇప్పటికే విడుదల చేశామని, ఇంటర్ కంటే ముందే పదో తరగతి పరీక్షలు నిర్వహిస్తున్నామని తెలిపారు.