పంజాబ్: కాంగ్రెస్ నేత, ప్రముఖ గాయకుడు సిద్ధూ మూస్ వాలా దారుణ హత్య, జీపులో వెళ్తుండగా దుండగుల కాల్పులు

May 30, 2022

పంజాబ్‌లో ఘోరం చోటుచేసుకుంది. రాష్ట్ర కాంగ్రెస్ నేత, ప్రముఖ పంజాబీ గాయకుడు ‘సిద్ధూ మూస్ వాలా’ దారుణ హత్యకు గురయ్యారు. మాన్సా జిల్లాలోని జవహర్ కే గ్రామంలోని ఒక దేవాలయం సమీపంలో ఈ ఘటన చోటు చేసుకుంది. సిద్ధూ జీపులో వెళ్తుండగా కొందరు గుర్తు తెలియని దుండగులు ఆయనను కాల్చి చంపారు. ఆయనపై 20 రౌండ్ల వరకు కాల్పులు జరిపినట్లు తెలుస్తోంది. ఈ ఘటనలో సిద్ధూతో పాటు మరో ఇద్దరికి కూడా గాయాలయ్యాయ. దీనిపై సమాచారం అందుకున్న పోలీసులు ఘటనా స్థలానికి చేరుకుని సిద్ధూని హుటాహుటిన అస్పత్రికి తరలించారు. అయితే అప్పటికే తీవ్రంగా గాయపడిన ఆయన చికిత్స పొందుతూ మృతి చెందారని వైద్యులు ప్రకటించారు.

కాగా సిద్ధూ మూస్ వాలా హత్యపై కాంగ్రెస్ దిగ్భ్రాంతి వ్యక్తం చేసింది. ఈ విషాదవార్త కాంగ్రెస్ పార్టీకి తీవ్ర దిగ్భ్రాంతిని కలిగించింది. అతని కుటుంబానికి, అభిమానులకు మరియు స్నేహితులకు మా ప్రగాఢ సానుభూతి అని జాతీయ కాంగ్రెస్ ఒక ప్రకటనలో పేర్కొంది. దీనిపై కాంగ్రెస్ అగ్ర నేత రాహుల్ గాంధీ కూడా స్పందించారు. “కాంగ్రెస్‌ నాయకుడు, ప్రతిభావంతుడైన కళాకారుడు సిద్ధూ మూసేవాలా హత్యతో తీవ్ర దిగ్భ్రాంతి మరియు బాధ కలిగింది. ప్రపంచవ్యాప్తంగా ఉన్న ఆయన ఆత్మీయులకు, అభిమానులకు నా హృదయపూర్వక సానుభూతి తెలియజేస్తున్నాను’ అని రాహుల్ గాంధీ ట్వీట్ చేశారు.

Deeply shocked and saddened by the murder of promising Congress leader and talented artist, Sidhu Moosewala.

My heartfelt condolences to his loved ones and fans from across the world. https://t.co/j1uXBfPLlS

— Rahul Gandhi (@RahulGandhi) May 29, 2022

కాగా పంజాబ్‌లో వీఐపీలకు భద్రతను ఉపసంహరించుకుంటున్నట్లు ప్రభుత్వం ప్రకటించిన ఒక్కరోజులోనే ఈ ఘటన కలకలం రేపుతోంది. పంజాబ్ పోలీసులు శనివారం భద్రతను ఉపసంహరించుకున్న 424 మందిలో సిద్ధూ మూస్ వాలా కూడా ఉన్నారు. సిద్దూ గత ఏడాది డిసెంబర్‌లో కాంగ్రెస్ పార్టీలో చేరారు. ఇటీవల జరిగిన అసెంబ్లీ ఎన్నికల్లో మాన్సా అసెంబ్లీ స్థానం నుంచి కాంగ్రెస్ టిక్కెట్‌పై పోటీ చేసిన ఆయన ఆప్‌కి చెందిన విజయ్ సింగ్లా చేతిలో ఓడిపోయారు. అయితే పంజాబ్‌లో ‘ఆప్’ అధికారంలోకి వచ్చినప్పటి నుండి, శాంతి భద్రతలు దిగజారిపోతున్నాయని, పట్టపగలే హత్యలు, పాటియాలలో హింసాత్మక ఘర్షణలు, ఇంకా పంజాబ్ పోలీసులపై దాడులే దీనికి ఉదాహరణ అని కాంగ్రెస్ విమర్శించింది.