మేడారం మహా జాతర: ఫిబ్రవరి 16 నుంచి 19 వరకు నాలుగు రోజులు నిర్వహణ

April 26, 2021

తెలంగాణలో శ్రీ సమ్మక్క–సారలమ్మల మహా జాతర తేదీలు ఖరారయ్యాయి. 2022లో జరగనున్న మేడారం మహా జాతరను ఫిబ్రవరి 16 నుంచి 19 వరకు నిర్వహించనున్నట్టు మేడారం పూజారులు ఆదివారం నాడు ప్రకటించారు. మాఘమాసంలో నాలుగు రోజులపాటుగా సమ్మక్క-సారలమ్మ మహా జాతరను వైభవంగా జరపనున్నట్టు తెలిపారు. ఫిబ్రవరి 16వ తేదీన సారలమ్మ దేవత, పగిడిద్దరాజు, గోవిందరాజులును గద్దెల వద్దకు తీసుకురావడం, ఫిబ్రవరి 17న చిలకలగుట్ట నుంచి సమ్మక్క దేవతను గద్దెల వద్దకు చేరుట, ఫిబ్రవరి 18న సమ్మక్క-సారలమ్మలకు ప్రజలు మొక్కులు సమర్పించుట, ఫిబ్రవరి 19 న వన ప్రవేశం, మహా జాతర ముగింపు కార్యక్రమాలు ఉంటాయని పూజారులు తెలిపారు. మరోవైపు రాష్ట్రంలో కరోనా వ్యాప్తి నేపథ్యంలో మే 1, 2021 నుంచి మే 15, 2021 వరకు మేడారం అమ్మవార్ల దర్శనాన్ని నిలిపివేస్తున్నట్లు ప్రకటించారు.