గ్రూప్‌-1 నోటిఫికేషన్‌ : 503 పోస్టుల భర్తీ, మే 2 నుంచి మే 31 వరకు దరఖాస్తు

April 27, 2022

తెలంగాణలో ఉద్యోగాల భర్తీ ప్రక్రియ ఊపందుకుంది. రాష్ట్రంలో మొత్తం 80,039 ఉద్యోగాలను భర్తీ చేయనుండగా, ముందుగా ఏప్రిల్ 25న 16,614 పోలీసు ఉద్యోగాల‌కు ప్రభుత్వం నోటిఫికేష‌న్‌ ను విడుదల చేసింది. ఇక తెలంగాణ యువత ఎప్పటినుంచో ఎదురుచూస్తున్న గ్రూప్‌-1 నోటిఫికేషన్‌ ను ఏప్రిల్ 26, మంగళవారం నాడు తెలంగాణ రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) విడుదల చేసింది. ఈ నోటిఫికేషన్ ద్వారా గ్రూప్‌-1 కు సంబంధించి 18 విభాగాలకు చెందిన 503 పోస్టులను భర్తీ చేయనున్నారు. 2014లో టీఎస్‌పీఎస్సీ ఏర్పడిన తర్వాత వెలువడిన తొలి గ్రూప్‌-1 నోటిఫికేషన్‌ ఇదే కావడంతో పాటుగా ఒకేసారిగా అత్యధిక పోస్టులు భర్తీ చేయడం కూడా ఇదే తొలిసారి. ఈ గ్రూప్‌ -1 ఉద్యోగాల భర్తీలో స్థానిక అభ్యర్థులకు 95 శాతం రిజర్వేషన్ ఉండనుంది.

ఈ పోస్టుల కోసం మే 2వ తేదీ నుంచి మే 31వ తేదీ వరకు అభ్యర్థులు దరఖాస్తులు చేసుకోవాలని టీఎస్‌పీఎస్సీ సూచించింది. ఈసారి గ్రూప్-1 పోస్టులు ప్రిలిమ్స్‌, మెయిన్స్‌ పరీక్షలు ద్వారానే భర్తీ చేయనున్నారు. అలాగే గతంలో ఈ పోస్టుల నియామకంలో ఉన్న ఇంటర్వ్యూ ప్రక్రియను రద్దు చేస్తూ ప్రభుత్వం ఇటీవలే నిర్ణయం తీసుకుంది. ప్రిలిమ్స్‌ పరీక్ష జూలై/ఆగస్టు 2022లో, మెయిన్స్‌ పరీక్ష నవంబరు/డిసెంబరు 2022 లో నిర్వహించే అవకాశాలున్నట్లు టీఎస్‌పీఎస్సీ తెలిపింది. ప్రిలిమ్స్‌, మెయిన్స్‌ ప్రశ్నపత్రాలు తొలిసారిగా తెలుగు. ఇంగ్లీష్ తో పాటుగా ఉర్దూలో కూడా అందించనున్నారు.