మార్చి 12న కర్ణాటకలో ప్రధాని మోదీ పర్యటన, బెంగ‌ళూరు-మైసూరు ఎక్స్‌ప్రెస్‌వేని జాతికి అంకితం

March 10, 2023

ప్ర‌ధాన మంత్రి న‌రేంద్ర మోదీ ఎల్లుండి (మార్చి 12, ఆదివారం) క‌ర్ణాట‌క‌ రాష్ట్రంలో ప‌ర్య‌టించ‌నున్నారు. ఈ పర్యటనలో భాగంగా దాదాపు రూ.16,000 కోట్ల విలువైన ప్రాజెక్టులను ప్రధాని జాతికి అంకితం చేయడంతో పాటుగా శంకుస్థాపనలు చేయనున్నారు. ఈ మేరకు ప్రధానమంత్రి కార్యాలయం ఒక ప్రకటన విడుదల చేసింది. ముందుగా ప్రధాని మాండ్య‌లో పర్యటించనున్నారు. ఆదివారం మ‌ధ్యాహ్నం 12 గంట‌ల స‌మ‌యంలో బెంగ‌ళూరు-మైసూరు ఎక్స్‌ప్రెస్‌వేని ప్రధాని మోదీ జాతికి అంకితం చేస్తారు.

ఈ ప్రాజెక్ట్‌లో NH-275లోని బెంగళూరు-నిడఘట్ట-మైసూరు సెక్షన్‌లో 6-లేనింగ్ లో ఉంటుంది. దాదాపు 8480 కోట్ల రూపాయల వ్యయంతో 118 కి.మీ పొడవున ఈ ప్రాజెక్టును అభివృద్ధి చేశారు. ఇది బెంగళూరు మరియు మైసూరు మధ్య ప్రయాణ సమయాన్ని దాదాపు 3 గంటల నుండి 75 నిమిషాలకు తగ్గిస్తుంది. ఈ ప్రాంతంలో సామాజిక-ఆర్థిక అభివృద్ధికి ఇది ఉత్ప్రేరకంగా పనిచేస్తుందని పేర్కొన్నారు. అదేవిధంగా మైసూరు- కుశాల్‌ నగర్ 4 లేన్ హైవేకు కూడా ప్రధాని శంకుస్థాపన చేయనున్నారు. 92 కిలోమీటర్ల మేర విస్తరించి ఉన్న ఈ ప్రాజెక్టును దాదాపు రూ.4130 కోట్లతో అభివృద్ధి చేయనున్నారు. బెంగుళూరుతో కుశాల్‌నగర్ కనెక్టివిటీని పెంచడంలో ఈ ప్రాజెక్ట్ కీలక పాత్ర పోషిస్తుందని మరియు ప్రయాణ సమయాన్ని 5 నుండి 2.5 గంటల వరకు సగానికి తగ్గించడంలో సహాయపడుతుందని తెలిపారు.

ఆ తర్వాత ఆదివారం మధ్యాహ్నం 3:15 గంటలకు హుబ్బ‌ళ్లి-ధార్వాడలో ప్రధాని వివిధ అభివృద్ధి కార్యక్రమాలకు ప్రారంభోత్సవాలు మరియు శంకుస్థాపనలు చేయనున్నారు. ఐఐటీ ధార్వాడ్‌ను జాతికి అంకితం చేయనున్నారు. ఈ ఇన్‌స్టిట్యూట్‌కు 2019 ఫిబ్రవరిలో శంకుస్థాపన కూడా ప్రధాని మోదీనే చేశారు. 850 కోట్లుపైగా వెచ్చించి దీన్ని అభివృద్ధి చేశారు. అలాగే శ్రీ సిద్ధారూఢ స్వామీజీ హుబ్బ‌ళ్లి స్టేష‌న్‌లో ప్ర‌పంచంలోనే అతి పొడవైన రైల్వే ప్లాట్‌ఫార‌మ్‌ను ప్ర‌ధాని జాతికి అంకితం చేయ‌నున్నారు. ఈ రికార్డును ఇటీవలే గిన్నిస్ బుక్ ఆఫ్ వరల్డ్ రికార్డ్స్ గుర్తించింది. దాదాపు 20 కోట్ల రూపాయలతో 1507 మీటర్ల పొడవైన ప్లాట్‌ఫారమ్‌ను నిర్మించారు.

హోసపేట-హుబ్బ‌ళ్లి- తినైఘాట్ సెక్షన్ విద్యుదీకరణ మరియు హోసపేట స్టేషన్‌ను అప్‌గ్రేడేషన్ ను ప్రధాని జాతికి అంకితం చేస్తారు. మరోవైపు హుబ్బ‌ళ్లి-ధార్వాడ్ స్మార్ట్ సిటీ వివిధ ప‌థ‌కాల‌కు ప్ర‌ధాని ప్రారంభోత్స‌వాలు, శంకుస్థాప‌న చేయ‌నున్నారు. ఈ ప్రాజెక్టుల మొత్తం అంచనా వ్యయం దాదాపు రూ.520 కోట్లు అని తెలిపారు. అలాగే జయదేవ హాస్పిటల్ మరియు రీసెర్చ్ సెంటర్‌కు ప్రధాని శంకుస్థాపన చేస్తారు. దాదాపు రూ.250 కోట్లతో ఆసుపత్రిని అభివృద్ధి చేయనున్నట్టు తెలిపారు. ఇక ఈ ప్రాంతంలో నీటి సరఫరాను మరింత పెంపొందించడానికి, రూ.1040 కోట్లతో వ్యయంతో మల్టీ విలేజ్ నీటి సరఫరా పథకానికి శంకుస్థాపన చేస్తారు. దాదాపు రూ.150 కోట్ల ఖర్చుతో తుప్పరిహళ్ల వరద నష్టం నియంత్రణ ప్రాజెక్టుకు కూడా ప్రధాని మోదీ శంకుస్థాపన చేయనున్నారు.