తెలంగాణలో ముగిసిన గ్రూప్-2 దరఖాస్తు ప్రక్రియ, 783 పోస్టులకు ఎంతమంది అభ్యర్థులు దరఖాస్తు చేశారంటే?

February 17, 2023

తెలంగాణ రాష్ట్రంలో గ్రూప్‌-2 ఉద్యోగాలకు సంబంధించిన దరఖాస్తు ప్రక్రియ ఫిబ్రవరి 16, గురువారంతో ముగిసింది. 783 గ్రూప్‌-2 పోస్టులకు గానూ మొత్తం 5,51,943 మంది అభ్యర్థులు దరఖాస్తు చేసుకున్నారని తెలంగాణ రాష్ట్ర పబ్లిక్ సర్వీస్ కమిషన్ (టీఎస్‌పీఎస్సీ) తెలిపింది. గ్రూప్-2 పరీక్ష విధానంలో నాలుగు పేపర్స్ ఉండగా, త్వరలోనే గ్రూప్-2 పరీక్ష షెడ్యూల్ ను టీఎస్‌పీఎస్సీ ప్రకటించనుంది.

ముందుగా గ్రూప్-2 కింద 783 పోస్టుల భర్తీకి టీఎస్‌పీఎస్సీ) 2022, డిసెంబర్ 29న నోటిఫికేషన్ విడుదల చేసింది. ఇందులో మున్సిపల్‌ కమిషనర్‌ గ్రేడ్‌–3, అసిస్టెంట్‌ కమర్షియల్‌ ట్యాక్స్‌ ఆఫీసర్, నాయిబ్‌ తహసీల్దార్‌ సహా పలు విభాగాలకు చెందిన పోస్టులు ఉన్నాయి. ఈ పోస్టుల కోసం అర్హులైన అభ్యర్థులంతా కమిషన్ వెబ్‌సైట్‌ లో https://.tspsc.gov.in/ లో ఉంచే నిర్ణిత ప్రొఫార్మాలో జనవరి 18వ తేదీ నుంచి దరఖాస్తు చేసుకునేందుకు అవకాశం కల్పించారు. కాగా ఫిబ్రవరి 16వ తేదీ సాయంత్రం 5 గంటలకు దరఖాస్తు గడువు ముగియడంతో రాష్ట్రవ్యాప్తంగా మొత్తం 5,51,943 మంది అభ్యర్థులు దరఖాస్తు చేసుకున్నారని టీఎస్‌పీఎస్సీ తెలిపింది. అయితే చివరి మూడు రోజుల్లోనే లక్షకుపైగా దరఖాస్తులు వచ్చినట్టు తెలుస్తుంది. దీంతో గ్రూప్-2 కి సంబంధించి ఒక్కో పోస్టుకు 705 మంది పోటీ పడనున్నారు.