కరోనా వైద్య పరీక్షలు ఎవరు చేయించుకోవాలి?

March 28, 2020

దేశంలో కోవిడ్-19 (కరోనా వైరస్) రోజురోజుకి మరింత విస్తరిస్తుంది. మార్చ్ 28, శనివారం నాటికీ దేశంలో 935 కరోనా పాజిటివ్ కేసులు నమోదు కాగా, తెలంగాణ రాష్ట్రంలో 59, ఆంధ్రప్రదేశ్ లో 13 నమోదయ్యాయి. ఈ నేపథ్యంలో కరోనా వ్యాప్తి చెందే విధానం పట్ల ప్రజలు తీవ్ర ఆందోళనకు గురవుతున్నారు. ఎవరైనా తుమ్మినా, దగ్గినా కూడా ఇతరులు భయపడే పరిస్థితులు ఏర్పడుతున్నాయి. దీంతో సాధారణ ఫ్లూ లక్షణాలకు కూడా కరోనా వైరస్‌ సోకిందేమోనని ప్రజలు ఆందోళన చెందుతున్నారు. ఇలాంటి పరిస్థితుల్లో ఎవరూ కరోనా పరీక్షలు చేయించుకోవాలి, ఎవరికీ అవసరం లేదు వంటి వివరాలతో కేంద్ర వైద్య, ఆరోగ్యశాఖ ఒక సమాచారపత్రాన్ని విడుదల చేసింది.

కేంద్ర వైద్య, ఆరోగ్యశాఖ మార్గదర్శకాలు:

అందరు కరోనా పరీక్ష చేయించుకోవాల్సిన అవసరం లేదు.
విదేశీ ప్రయాణ నేపధ్యం కలిగిన వారు మరియు కరోనా పాజిటివ్ గా తేలిన వ్యక్తులతో అత్యంత సన్నిహితంగా ఉన్నవారు పరీక్షలు చేయించుకోవాలి.
గత 14 రోజుల్లో విదేశాల్లో ప్రయాణం చేసి వచ్చిన ప్రతి ఒక్కరూ పరీక్షలు చేయించుకోవాలి.
కరోనా పాజిటివ్ గా తేలిన వ్యక్తులతో కలిసి తిరిగిన వారు కూడా తప్పనిసరిగా పరీక్షలు చేయించుకోవాలి.
హెల్త్ కేర్ వర్కర్స్ కూడా పరీక్షలు చేయించుకోవాలి
శ్వాసకోశ సంబంధిత వ్యాధులతో, ఇతర తీవ్రమైన వ్యాదులతో బాధపడుతున్న వారు తప్పనిసరిగా వైద్య పరీక్షలు చేయించుకోవాలి.
ఆసుపత్రిలో కరోనా పాజిటివ్ వ్యక్తికీ చికిత్స అందించిన సమయంలో జాగ్రత్తలు వహించని హెల్త్ వర్కర్స్ అందరు కరోనా పరీక్షలు చేయించుకోవాల్సిందే.
కరోనా పాజిటివ్ గా తేలిన వ్యక్తి తో కలిసున్నా కుటుంబ సభ్యులంతా పరీక్షలు చేయించుకోవాలి.