దేశంలో ప్రికాషన్/బూస్టర్ డోస్ కోవిడ్-19 వ్యాక్సినేషన్ ప్రక్రియను మరింత వేగవంతం చేసే దిశగా కేంద్ర ప్రభుత్వం కీలక నిర్ణయాలు తీసుకుంటుంది. హైదరాబాద్ కు చెందిన ప్రముఖ ఫార్మా సంస్థ భారత్ బయోటెక్ సంస్థ అభివృద్ధి చేసిన ఇంట్రానాసల్ కోవిడ్ వ్యాక్సిన్-బీబీవి154 (ఇన్కోవాక్) ను 18 సంవత్సరాల కంటే ఎక్కువ వయస్సు ఉన్నవారికి కోవిడ్-19 బూస్టర్ డోస్గా పరిమితులతో కూడిన అత్యవసర వినియోగం కోసం డ్రగ్స్ కంట్రోలర్ జనరల్ ఆఫ్ ఇండియా (డీసీజీఐ) ఇటీవలే అనుమతులిచ్చింది. ఈ నేపథ్యంలో ఇన్కోవాక్ వ్యాక్సిన్ ధరపై భారత్ బయోటెక్ సంస్థ తాజాగా ఒక ప్రకటన చేసింది.
ముక్కు ద్వారా తీసుకునే ఈ ఇన్కోవాక్ వ్యాక్సిన్ ను కేంద్ర/రాష్ట్ర ప్రభుత్వాలకు ఒక్కో డోసుకు రూ.325 చొప్పున మరియు ప్రైవేట్ ఆసుపత్రులు/ప్రైవేట్ మార్కెట్స్ కు ఒక్కో డోసుకు రూ.800 చొప్పున విక్రయించనున్నట్టు భారత్ బయోటెక్ వెల్లడించింది. కాగా ప్రైవేట్ ఆసుపత్రులలో 5 శాతం జీఏస్టీ, అడ్మినిస్ట్రేటివ్ ఛార్జీగా రూ.150 కలిపితే ఒక్కో డోస్కు దాదాపు రూ.1,000 ధర అయ్యే అవకాశముంది.
కొవిన్ యాప్ ద్వారా ఈ వ్యాక్సిన్ అందుబాటులో ఉంటుందని తెలిపారు. కోవాక్జిన్ లేదా కోవిషీల్డ్ రెండు డోసులు వ్యాక్సిన్ తీసుకున్న వారు, బూస్టర్ డోస్ కింద ఈ ఇన్కోవాక్ ఇంట్రానాసల్ వ్యాక్సిన్ తీసుకునేందుకు కేంద్రం అనుమతి ఇచ్చింది. కాగా జనవరి నెల చివరి వారంలో ప్రైవేట్ వ్యాక్సినేషన్ కేంద్రాలలో ఇన్కోవాక్ వ్యాక్సిన్ అందుబాటులోకి రానునట్టు తెలుస్తుంది.
మ్యాంగో న్యూస్ లింక్స్:
టెలీగ్రామ్ : https://t.me/mangonewsofficial
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xE