తెలంగాణ రాష్ట్రంలో మొత్తం ఓటర్ల సంఖ్య ఎంతంటే?

November 11, 2022

తెలంగాణ రాష్ట్రంలో ప్రస్తుతం అర్హులైన ఓటర్ల జాబితాను రాష్ట్ర ఎన్నికల సంఘం (ఎస్‌ఈసీ) ప్రకటించింది. తెలంగాణ ఓటర్ డ్రాఫ్ట్ స్పెషల్ సమ్మరీ రివిజన్ (ఎస్ఎస్ఆర్)-2023 బుధవారం ప్రచురించబడింది. ఈ నేపథ్యంలో ఈ జాబితా ప్రకారం రాష్ట్రంలో మొత్తం 2,95,80,736 మంది ఓటర్లు ఉన్నట్లు తెలంగాణ రాష్ట్ర ప్రధాన ఎన్నికల అధికారి వికాస్ రాజ్ గురువారం ఒక ప్రకటనలో తెలిపారు. రాష్ట్రవ్యాప్తంగా కొత్తగా 3,45,648 మంది ఓటు హక్కు పొందినట్టు ప్రకటించారు. అలాగే 11,36,873 మంది ఓటర్లను తొలగించినట్టు తెలిపారు.

రాష్ట్రంలో 18 నుండి 19 సంవత్సరాల వయస్సు గల యువ ఓటర్లు 83,207 మంది ఉన్నారని చెప్పారు. ఇక ఓటర్ల తొలగింపు విషయంలో ఏవైనా అభ్యంతరాలు ఉంటే జిల్లా ఎన్నికల అధికారికి నిర్ణీత వ్యవధిలో 15 రోజులలోపు అప్పీల్ దాఖలు చేసుకోవచ్చని చెప్పారు. అలాగే ఈ ఎస్ఎస్ఆర్ సమయంలో జిల్లా ఎన్నికల అధికారులు రాజకీయ పార్టీలతో వారానికోసారి సమావేశాలు నిర్వహించి, కేంద్ర ఎన్నికల సంఘం ఆదేశాల మేరకు స్వీకరించిన ఫారమ్స్ మరియు వాటిపై తీసుకున్న చర్యల వివరాలను తెలియజేయాలని ప్రధాన ఎన్నికల అధికారి వికాస్ రాజ్ ఆదేశాలు ఇచ్చారు.